ഇക്ക്യു (1394-1481)-സെന്‍ കവിതകള്‍

*
ആരും കുഴിക്കാത്തൊരു കിണർ-
ഓളങ്ങൾ നിറഞ്ഞത്‌-
രൂപമില്ലാത്ത,ഭാരമില്ലാത്ത ഒരാൾ
ദാഹം തീർക്കുന്നതിൽ.
*
നിങ്ങൾ വിളിക്കുമ്പോൾ
ഞാൻ വിളികേൾക്കുന്നതെങ്ങനെ?
നിങ്ങളുടെ ജീവനപഹരിക്കുകയാണത്‌.
*
ചോദ്യങ്ങളെഴുതിവച്ച്‌
നിങ്ങളുറങ്ങാൻ കിടക്കുന്നു-
ഉണരുമ്പോൾ
നിങ്ങളുമില്ല.
*
ഈ പാഴ്ക്കിനാവും ഉന്മാദവും
ഇത്ര മനോഹരമായതെങ്ങനെ?
*
ചങ്ങാതിയെ ചിതയിൽ വച്ചു പോരുമ്പോൾ
സ്വന്തം മരണം പോലെ
പുകയുന്നതെന്നുള്ളിൽ.
*
അന്യന്റെ വീട്ടുവഴി
ഇരുളടഞ്ഞതാണെന്നു
പറയുന്നു നിങ്ങൾ-
സ്വന്തം ഹൃദയത്തിൻ വഴി
പായൽ പിടിച്ചതി-
നെന്തു പറയും നിങ്ങൾ?
*
വീണു കിട്ടുന്നതല്ല മനശ്ശാന്തി-
ഉരിയാട്ടമില്ലാത്ത ചുമരും നോക്കി
ആറുകൊല്ലമിരിക്കുക;
നിങ്ങളുടെ മുഖത്തെ നിങ്ങൾ
മെഴുകുതിരിയെരിയുമ്പോലെ
എരിഞ്ഞുതീരട്ടെ.
*
പോരിനു പോകുമ്പോളെന്തു സെൻ?-
വടിയെടുത്തടിയ്ക്കുക
ശത്രുക്കളെ.
*
എൻപതു കഴിഞ്ഞു
ബലം കെട്ട ഞാൻ
ബുദ്ധനു നിവേദിക്കുന്നു
സ്വന്തം മലം.
*