ചാൾസ്‌ സിമിക്‌ - കവിതകൾ

 

തണ്ണിമത്തങ്ങകൾ

പഴക്കടകളിൽ
ഹരിതബുദ്ധന്മാർ-
നമ്മൾ പുഞ്ചിരി കഴിക്കുന്നു
പല്ലുകൾ തുപ്പികളയുന്നു.

 

ഫോർക്ക്‌

ഈ വിചിത്രവസ്തു
നരകത്തിൽനിന്ന്
നേരേയിങ്ങിഴഞ്ഞെത്തിയതാവണം.
നരഭോജി കഴുത്തിലണിഞ്ഞ
പക്ഷിക്കാലിനെപ്പോലെയുണ്ടിത്‌.
നിങ്ങളതിനെ കൈയ്യിലെടുക്കുമ്പോൾ
ഒരിറച്ചിക്കഷണത്തിൽ കുത്തിയിറക്കുമ്പോൾ
പക്ഷിയുടെ ശേഷിച്ച ഭാഗങ്ങളെക്കുറിച്ചു
ചിന്തിക്കുക സാധ്യമാണ്‌.
അതിന്റെ തല
നിങ്ങളുടെ മുഷ്ടി പോലെ
വലുതും രോമരഹിതവും ചുണ്ടില്ലാത്തതും
അന്ധവുമത്രെ.

 

കവി

വേനൽച്ചൂടിൽ ഒഴിഞ്ഞ പേജിൽ
ഇണചേരുന്നയീച്ചകളാണു വാക്കുകൾ;
കവി അതു കൗതുകത്തോടെ
കണ്ടുനിൽക്കുന്ന ഒരാൾ മാത്രം.

 

ചാൾസ്‌ സിമിക്‌ 1936-ൽ ബെൽഗ്രാഡിൽ ജനിച്ചു. പതിനാറാമത്തെ വയസ്സിൽ
അമേരിക്കയിലേക്കു കുടിയേറി. പാരീസ്‌ റിവ്യൂവിന്റെ കവിതാവിഭാഗം എഡിറ്ററായിരുന്നു.