“സ്വാഗതം, പ്രിയകവേ,
അങ്ങെപ്പോഴാണു ഞങ്ങൾക്കു കവിത വായിച്ചുകേൾപ്പിക്കാൻ പോകുന്നത്?
ഷിഫ്റ്റു കഴിഞ്ഞായാലോ?”
“ഷിഫ്റ്റു കഴിഞ്ഞാൽ പണിക്കാർ തളർന്നിരിക്കയാവില്ലേ,
ക്വാർട്ടേഴ്സിലേക്കു മടങ്ങാൻ അക്ഷമരായിരിക്കുമവർ.”
“എന്നാൽ ശനിയാഴ്ചയായാലോ?”
“ശനിയാഴ്ചയല്ലേ ജോലിക്കാർ കുളിക്കുകയും തുണി തിരുമ്പുകയും
വീട്ടിലേക്കു കത്തെഴുതുകയും ചെയ്യുന്നത്.”
“എന്നാൽ ഞായറാഴ്ചയായാലോ?”
“ഞായറാഴ്ച പണിക്കാർ ക്വാർട്ടേഴ്സിലുണ്ടാവില്ല,
ചെറുപ്പക്കാർ കാമുകിമാരെ കാണാൻ പോയിട്ടുണ്ടാവും,
മുതിർന്നവർ ട്രെയിൻ പിടിക്കാൻ സ്റ്റേഷനിലേക്കു പോവുകയായിരിക്കും.”
“അപ്പോൾ ഞങ്ങൾക്കു കവിത വായിച്ചുതരാൻ അങ്ങയ്ക്കു സമയമില്ലെന്നാണോ?”
“ഞാൻ പറഞ്ഞല്ലോ, നമുക്കു സമയമില്ല,
എന്നാൽ നമുക്കൊരുമിച്ച് അതുണ്ടാക്കാവുന്നതേയുള്ളു.“
No comments:
Post a Comment