മെലിഞ്ഞ മുളന്തണ്ട്,
ഒരാശ്രമജീവിയെപ്പോലെ.
ആർഭാടങ്ങളില്ലാത്ത പൂച്ചെടി,
ഒരു കൌമാരക്കാരിയെപ്പോലെ.
മുളന്തണ്ടിലാടിക്കളിക്കുന്ന കുരുവി.
പൂക്കളിൽ വെള്ളം തളിയ്ക്കുന്ന ചാറ്റമഴ.
അവൻ പറക്കാനൊരുമ്പെടുമ്പോൾ
ഇലകളാകെ വിറ കൊള്ളുന്നു.
എന്തൊരത്ഭുതാവഹമായ സിദ്ധിയാണത്,
ഒരു തൂലികയും ഒരു പായ കടലാസും കൊണ്ട്
ഒരു വസന്തം സൃഷ്ടിക്കുക!
കവിതയിൽ കൈ വച്ചിരുന്നുവെങ്കിൽ,
എനിക്കുറപ്പാണ്‌,
പദങ്ങൾ കൊണ്ടയാൾ പന്താടിയേനെ!
സു ദുംഗ്-പോ (1037-1101)- സുങ്ങ് കാലഘട്ടത്തിൽ ജീവിച്ചിരുന്ന ചൈനീസ് കവി. വാങ്ങ് ഷെൻ (1048-1122) ചെയ്ത ഒരു പ്രകൃതിദൃശ്യമാണ്‌ ഈ കവിതയുടെ വിഷയം.
No comments:
Post a Comment