പടയാളികളെപ്പോലെയാണയാളെത്തുക എന്നവൾ കരുതിയിരുന്നു,
ആയുധങ്ങളുടെ കലമ്പലും കാഹളനാദങ്ങളുമായി;
അയാൾ വന്നതു പക്ഷേ, ഒച്ച കേൾപ്പിക്കാതെയായിരുന്നു
അവളതറിഞ്ഞതുതന്നെയില്ല.
വധുവിനെ കൈക്കൊള്ളാനായി രാജകുമാരനെപ്പോലയാളെത്തുമ്പോൾ
വെയിലേറ്റയാളൂടെ പടച്ചട്ട വെട്ടിത്തിളങ്ങുന്നതിനെക്കുറിച്ചവളോർത്തിരുന്നു:
പക്ഷേ ആസന്നരാത്രിയുടെ അരണ്ട വെളിച്ചത്തിൽ
അയാൾ തനിക്കരികിൽ നില്ക്കുന്നതായി അവൾ കണ്ടെത്തുകയായിരുന്നു.
അയാളുടെ വിചിത്രവും ധീരവുമായ കണ്ണുകളൊന്നു നോക്കുമ്പോൾ
ഒരാകസ്മികദീപ്തിയിലേക്കു തന്റെ ഹൃദയമുണരുന്നതവൾ സ്വപ്നം കണ്ടിരുന്നു;
അവളയാളുടെ മുഖത്തു കണ്ടതു പക്ഷേ,
ദീർഘസൌഹൃദത്തിന്റെ പരിചിതവെളിച്ചമായിരുന്നു.
കൊടുങ്കാറ്റിന്റെ പ്രചണ്ഡതയിൽ കടലിളകിമറിയുമ്പോലെ
അയാൾ വരുമ്പോൾ തന്റെ ഹൃദയമിളകിമറിയുമെന്നവൾ സ്വപ്നം കണ്ടിരുന്നു:
അയാൾ കൊണ്ടുവന്നതു പക്ഷേ, സ്വർഗ്ഗീയശാന്തിയുടെ സാന്ത്വനമായിരുന്നു,
അവളുടെ ജീവിതത്തെ മകുടം ചൂടിച്ച ഒരു സ്വസ്ഥതയും.
എല്ലാ വീലർ വിൽക്കോക്സ് (1850-1919)- അമേരിക്കൻ എഴുത്തുകാരി.
No comments:
Post a Comment