മരിച്ച കുഞ്ഞിനെ ഉദരത്തിൽ പേറി ഒരമ്മ അലഞ്ഞുനടക്കുന്നു
ഈ കുഞ്ഞ് ഇനിയും പിറന്നിട്ടില്ല.
അവന്റെ നേരമെത്തുമ്പോൾ മരിച്ച കുഞ്ഞു ജനിക്കും,
ആദ്യം തലയും പിന്നെ ഉടലും ചന്തിയും പുറത്താക്കി.
ഈ കുഞ്ഞു പക്ഷേ, കൈയിട്ടു തല്ലില്ല,
ആദ്യത്തെ കരച്ചിൽ കരയില്ല,
അവന്റെ മുതുകത്തവർ തട്ടില്ല,
അവന്റെ കണ്ണിലവർ മരുന്നിറ്റിക്കില്ല,
അവനെ കുളിപ്പിച്ചിട്ടു പൊതിഞ്ഞെടുക്കുകയുമില്ല.
അവൻ ജീവനുള്ള കുഞ്ഞിനെപ്പോലായിരിക്കില്ല.
ജന്മം കൊടുത്തതിന്റെ ശാന്തതയോ അഭിമാനമോ അവന്റെ അമ്മയ്ക്കുണ്ടാവില്ല,
അവന്റെ ഭാവിയെക്കുറിച്ചോർത്തവർ ആവലാതിപ്പെടെന്ടതില്ല്ല.
ഈ ലോകത്തെങ്ങനെയാണവനെ സംരക്ഷിക്കുകയെന്ന്,
അവനു വേണ്ടത്ര മുലപ്പാൽ തനിക്കുണ്ടോയെന്ന്,
വേണ്ടത്ര തുണികളുണ്ടോയെന്ന്,
മുറിയിൽ ഒരു തൊട്ടിലു കൂടി എങ്ങനെ കെട്ടുമെന്ന്,
അവർ തന്നോട് തന്നെ ചോദിക്കുകയും വേണ്ട.
ഉണ്ടാകും മുമ്പേ ഈ കുഞ്ഞില്ലാതായി.
അവനുമുണ്ടാവും സിമിത്തേരിയുടെ ഓരത്ത് ഒരു കൊച്ചു കുഴിമാടം,
ഓർമ്മിക്കാനൊരു നാളും,
അവനെക്കുറിച്ചോർമ്മിക്കാൻ അധികമൊന്നുമുണ്ടാവില്ലെങ്കിലും.
“രാഷ്ട്രസുരക്ഷയോടു ബന്ധപ്പെട്ട കാരണങ്ങളാൽ”
*1988 ജനുവരി മാസത്തിൽ
അമ്മയുടെ ഉദരത്തിൽ വച്ചു കൊല്ലപ്പെട്ട
ഒരു കുഞ്ഞിന്റെ ചരിത്രമാണിത്.
*ഇസ്രേലി-പാലസ്തീൻ സംഘർഷങ്ങളുടെ കാലം
No comments:
Post a Comment