സൂഫിവചനങ്ങൾ

*

പ്രഭോ!
ഞാനങ്ങയെ പൂജിക്കുന്നത്‌ നരകഭയം കൊണ്ടാണെങ്കിൽ
എന്നെ നരകത്തിലേക്കെറിയൂ;
ഞാനങ്ങയെ പൂജിക്കുന്നത്‌ സ്വർഗ്ഗേച്ഛ കൊണ്ടാണെങ്കിൽ
എനിക്കു സ്വർഗ്ഗം നിഷേധിക്കൂ.

(റാബിയ)


*

ഒരു ഗുരു ശിഷ്യന്മാരെ പഠിപ്പിക്കുകയാണ്‌:
വാതിൽക്കൽ നിർത്താതെ മുട്ടിക്കൊണ്ടിരിക്കുന്നവനു മുന്നിൽ വാതിൽ തുറക്കപ്പെടും. അതു കേട്ടു റാബിയ ചോദിച്ചു:
'അതു തുറക്കപ്പെടും' എന്നു നിങ്ങൾ എന്തിനു പറയണം? വാതിൽ അടച്ചിട്ടേയില്ലല്ലോ.


*

ബസ്രയിലെ ഹസ്സൻ റാബിയയെ കാണാൻ ചെന്നു. അവർ ഒരു പറ്റം മൃഗങ്ങൾക്കിടയിലിരിക്കുകയാണ്‌. ഹസ്സനെ കണ്ടയുടനെ മൃഗങ്ങൾ ഓടിപ്പോയി. അതെന്തുകൊണ്ടാണെന്ന് ഹസ്സൻ അന്വേഷിച്ചപ്പോൾ റാബിയ പറഞ്ഞു;
നിങ്ങൾ മാംസം തിന്നുന്നയാളല്ലേ? എനിക്കു തിന്നാൻ ഉണക്കറൊട്ടിയേയുള്ളു.


*

ഒരു സൂഫിയെ സൽക്കരിക്കുമ്പോൾ ഉണക്കറൊട്ടി തന്നെ ധാരാളമെന്നോർക്കുക.

(ഹാരിത്‌ മുഹസിബി)


*

ഉള്ളു കൊണ്ടറിയുന്നവന്‌ ഒരു ചേഷ്ട തന്നെ ധാരാളം:
ശ്രദ്ധയില്ലാത്തവനു മുന്നിലോ, ആയിരം വ്യാഖ്യാനങ്ങളും വ്യർത്ഥം.

(ഹാജി ബക്താഷ്‌)


*

നിനക്കുള്ള മരുന്ന് നിന്നിൽത്തന്നെയുണ്ട്‌; നീയതു കാണുന്നില്ല.
നിന്റെ വ്യാധി നീ തന്നെയാണ്‌; നീയതറിയുന്നുമില്ല.

(ഹസ്രത്‌ അലി)


*

മരണത്തെയോർത്തുകൊണ്ട്‌ ഉറങ്ങാൻ കിടക്കുക;
ഇനി അധികം ആയുസ്സില്ലെന്ന ചിന്തയുമായി
ഉറക്കം വിട്ടെഴുന്നേൽക്കുക.

(ഉവൈസ്‌ എൽ-ക്വാമി)


*

ഒരു ബാലൻ വെളിച്ചവുമേന്തി നടക്കുന്നതു ഞാൻ കണ്ടു.
അവനത്‌ എവിടെ നിന്നു കിട്ടിയെന്നു ഞാനാരാഞ്ഞു.
അവൻ അതൂതിക്കെടുത്തിയിട്ടു ചോദിച്ചു:
'അതെവിടെപ്പോയെന്ന് ഇനി നിങ്ങളൊന്നു പറയൂ.'

(ബസ്രയിലെ ഹസ്സൻ)


*

ഒരാൾ ഉവൈസ്‌ എൽ-ക്വാമിയെ ചെന്നുകണ്ട്‌ കുറേ പണം മുന്നിൽ വച്ചു. അദ്ദേഹം അതു സ്വീകരിക്കാൻ തയാറായില്ല.
'എന്റെ കൈയിൽ ഒരു നാണയമുണ്ട്‌; എനിക്കതിന്റെ ആവശ്യമേയുള്ളു.'
'അതെത്ര കാലത്തേക്കുണ്ടാവും? ഒന്നിനും തികയില്ല.' മറ്റേയാൾ പറഞ്ഞു.
ഉവൈസ്‌ പറഞ്ഞു:
'ഈയൊരു നാണയം തികയാത്തിടത്തോളം കാലം ഞാൻ ജീവിക്കുമെന്നുറപ്പു തരൂ; എങ്കിൽ ഞാൻ നിങ്ങളുടെ സമ്മാനം സ്വീകരിക്കാം.'


*