എല്വാദ് - ഗബ്രിയേൽ പേരി

---

ഒരു മനുഷ്യൻ മരിച്ചുപോയി
ജീവിതത്തിലേക്കു മലർക്കെത്തുറന്ന കൈകളല്ലാതെ
മറ്റൊരു കവചവുമില്ലാതിരുന്ന ഒരാൾ
ഒരു മനുഷ്യൻ മരിച്ചുപോയി
തോക്കുകൾ വെറുക്കപ്പെടുന്ന പാതയല്ലാതെ
മറ്റൊരു പാതയുമില്ലാതിരുന്ന ഒരാൾ
ഒരു മനുഷ്യൻ മരിച്ചുപോയി
മരണത്തിനെതിരെ മറവിക്കെതിരെ
യുദ്ധം തുടരുന്ന ഒരാൾ

അയാൾ ആഗ്രഹിച്ചതൊക്കെ
നാമാഗ്രഹിച്ചവയായിരുന്നു
ഇന്നും നാമാഗ്രഹിക്കുന്നവയും
ഹൃദയത്തിൽ കണ്ണുകളിൽ
ആഹ്ളാദം വെളിച്ചമാവണമെന്ന്
ഭൂമിയിൽ നീതി വേണമെന്ന്

നമ്മെ ജീവിക്കാൻ തുണയ്ക്കുന്ന വാക്കുകളുണ്ട്
വെറും സാധാരണവാക്കുകളുമാണവ
ഊഷ്മളത എന്ന വാക്ക് വിശ്വാസം എന്ന വാക്ക്
സ്നേഹം നീതി സ്വാതന്ത്ര്യം എന്ന വാക്ക്
കുട്ടി എന്ന വാക്ക് ദയ എന്ന വാക്ക്
ചില പൂക്കളുടെയും ചില പഴങ്ങളുടെയും പേരുകൾ
ധൈര്യം എന്ന വാക്ക് കണ്ടുപിടുത്തം എന്ന വാക്ക്
സഹോദരനെന്ന വാക്ക് സഖാവെന്ന വാക്ക്
ചില ദേശങ്ങളുടെയും ഗ്രാമങ്ങളുടെയും പേരുകൾ
സ്ത്രീകളുടെയും സ്നേഹിതരുടെയും പേരുകൾ
ഇനി നാം പേരി എന്ന പേരു കൂടി കൂട്ടിച്ചേർക്കുക
നമുക്കു ജീവിതം നല്കുന്നതിനൊക്കെയുമായിട്ടാണ്‌ പേരി മരിച്ചത്
നമുക്കയാളെ സ്നേഹിതൻ എന്നു വിളിക്കുക
വെടിയുണ്ടകളേറ്റു ചിതറിയതാണയാളുടെ നെഞ്ച്
എന്നാലും അയാൾ കാരണം നമുക്കന്യോന്യം നന്നായറിയാമെന്നായിരിക്കുന്നു
നമുക്കന്യോന്യം സ്നേഹിതൻ എന്നു വിളിക്കുക
അയാളുടെ പ്രത്യാശ ജീവിക്കുന്നു

1944

---

ഗബ്രിയേൽ പേരി(1902-1941) ഇടതുപക്ഷക്കാരനായ ഫ്രഞ്ചുരാഷ്ട്രീയപ്രവർത്തകൻ. നാസി അധിനിവേശകാലത്ത് കമ്മ്യൂണിസ്റ്റുസാഹിത്യം പ്രചരിപ്പിച്ചുവെന്ന പേരിൽ അറസ്റ്റു ചെയ്യപ്പെട്ടു; 1941 ഡിസംബർ 15ന്‌ വെടിവച്ചു കൊന്നു.

---