വാസ്കോ പോപ്പാ-എന്റെ പൂർവ്വികരുടെ ഗ്രാമത്തിൽ

ആരോയെന്നെ പുണരുന്നു
ആരോയെന്നെ ചെന്നായക്കണ്ണുകൾ കൊണ്ടുഴിയുന്നു
എനിക്കയാളെ നേരാംവണ്ണം കാണേണ്ടതിലേക്കായി
ആരോ തന്റെ തൊപ്പിയൂരിമാറ്റുന്നു

ഞാനും നീയും തമ്മിലുള്ള ബന്ധം നിനക്കറിയുമോ
സകലരും എന്നോടു ചോദിക്കുകയാണ്‌

ഞാനറിയാത്ത കിഴവന്മാരും കിഴവികളും
എന്റെയോർമ്മയിലെ കുട്ടികളുടെ
പേരുകൾ തട്ടിയെടുത്തിരിക്കുന്നു

ഞാനൊരാളോടു ചോദിച്ചു
ദൈവത്തെയോർത്ത്‌ ഒന്നു പറയൂ,
ജോർജ്ജ്‌ വുൾഫ്‌- ആളിപ്പോഴും ജീവനോടുണ്ടോ

ആൾ ഞാൻ തന്നെ
പരലോകത്തിന്റെ സ്വരത്തിൽ ഒരാൾ പറഞ്ഞു

ഞാനയാളുടെ കവിളത്തു വിരലോടിച്ചു
കണ്ണുകൾ കൊണ്ട്‌ ഞാനയാളോടു കെഞ്ചി
എനിക്കു ജീവനുണ്ടോയെന്ന് ഒന്നു പറയാമോ