പുസ്തകചിത്രീകരണങ്ങളിലെ സൌന്ദര്യധാമങ്ങളെ എനിക്കു വേണ്ട,
വിലകെട്ടൊരു കാലത്തിന്റെ ദരിദ്രോല്പന്നങ്ങളാണവ;
മടമ്പുയർന്ന ചെരുപ്പുകൾ, കൈകളിൽ ചപ്ളാങ്കട്ടകൾ:
എന്റേതു പോലൊരു ഹൃദയത്തിന്റെ ദാഹം തീർക്കാനവർ പോര.
ഗവാർണിയുടെ കാവ്യദേവത, ആ വിളർച്ചക്കാരിക്കിരിക്കട്ടെ,
രക്തപ്രസാദമില്ലാത്ത ഈ ദീനക്കാരിറാണിമാർ;
ഈ വിളറിവെളുത്ത പനിനീർപ്പൂക്കളിൽ ഞാൻ കാണുന്നില്ല,
എന്റെ ആദർശത്തിന്റെ ജ്വലിക്കുന്ന രക്തപുഷ്പം.
ഏതു ഗർത്തത്തിലുമാഴമേറിയ ഈ ഹൃദയത്തിനു വേണം
മാക്ബത്ത് പ്രഭ്വീ, ചോര പുരണ്ട നിന്റെ കൈകൾ,
ശീതദേശത്തവതരിച്ച ഈസ്ക്കിലസിന്റെ നായികേ.
അല്ലെങ്കിൽ നീ, ആഞ്ഞ്ജലോയുടെ പുത്രീ, മഹാരാത്രീ,
അതികായന്മാരുടെ ചുണ്ടുകൾക്കു ദാഹം തീർക്കുന്ന മാറുമായി
വിചിത്രമായൊരു പടുതിയിൽ ചരിഞ്ഞുകിടക്കുന്നവളേ.
ഗവാർണി - ക്ഷുദ്രവിഷയങ്ങൾ ചിത്രീകരിച്ചിരുന്ന ഒരു കാർട്ടൂണിസ്റ്റ്
ഈസ്ക്കിലസ്സിന്റെ നായിക - ഈസ്ക്കിലസ്സിന്റെ നാടകത്തിലെ പ്രതികാരദുർഗ്ഗയായ നായിക, ക്ളിറ്റെമ്നെസ് ട്രയെ സ്കോട്ടിഷ് പശ്ചാത്തലത്തിൽ പ്രതിഷ്ഠിച്ചാൽ മാക്ബത്ത് പ്രഭ്വി ആയി എന്ന അർത്ഥത്തിൽ.
ആഞ്ഞലസ്സിന്റെ പുത്രി - ഫ്ളോറൻസിലെ മെഡിച്ചി ചാപ്പലിൽ മൈക്കലാഞ്ഞെലോ കൊത്തിവച്ച രാത്രിയുടെ ശില്പം, ബലിഷ്ഠയും നഗ്നയുമായ സ്ത്രീരൂപത്തിൽ; ഗ്രീക്കുപുരാണത്തിൽ ടൈറ്റന്മാർ എന്ന അതികായരായ ദേവന്മാരുടെ അമ്മയാണ്‌ രാത്രി.
No comments:
Post a Comment