1. കടലിൽ കൌമാരക്കാർ
ഈ കടൽ കൌമാരക്കാരെക്കൊണ്ടു നിറഞ്ഞിരിക്കുന്നു,
തിരപ്പുറത്തു നടക്കാൻ പഠിക്കുകയാണവർ, നില്ക്കാനും,
ചിലനേരം ഒഴുക്കിൽ കൈകൾ തളർത്തിയിട്ടും,
ചിലനേരം ഒരു വെയില്ക്കതിരിൽ മുറുകെപ്പിടിച്ചും.
ഞാനോ, ഞാൻ കടപ്പുറത്തു വളഞ്ഞുകൂടിക്കിടക്കുന്നു,
വന്നിറങ്ങിയ യാത്രക്കാരെപ്പോലെ അവരെ നോക്കിക്കിടക്കുന്നു.
അവർക്കൊന്നു കാലു തെറ്റുന്നതെനിക്കു കാണണം,
തിരപ്പെരുക്കത്തിൽ പതറി മുട്ടിലിരിക്കുന്നതെങ്കിലും.
പക്ഷേ മെയ് വഴക്കമുള്ളവരാണവർ, സമചിത്തരും-
തിരപ്പുറത്തു നടക്കാനവർ പഠിച്ചിരിക്കുന്നു, നില്ക്കാനും.
2. ഒരു കവിത
നോക്കൂ, ഒരു നാൾ നിന്നെ ഞാൻ കടന്നുപിടിക്കുകയും
നിന്റെ ഉള്ളംകാലിൽ ചുംബിക്കുകയും ചെയ്തുവെന്നിരിക്കട്ടെ,
അതില്പിന്നെ നടക്കുമ്പോൾ നീയൊന്നു ഞൊണ്ടില്ലേ,
എന്റെ ചുംബനം ഞെരിഞ്ഞാലോയെന്ന പേടിയോടെ?
നികിത സ്റ്റാനെസ്ക്യു (1933-1983)- റുമേനിയൻ കവിയും ലേഖകനും.
No comments:
Post a Comment