വിപ്ളവത്തെക്കുറിച്ചു പരാതി പറയുകയായിരുന്നു എന്റെ ഒരനന്തരവൾ:
പണ്ടില്ലാത്ത വിലയാണത്രെ, ബ്രായ്ക്കിപ്പോൾ.
മുലയുണ്ടായാലത്തെ സ്ഥിതി എനിക്കറിയില്ല,
അതേ സമയം ബ്രായില്ലാതെ നടക്കുന്നതിൽ
എന്തെങ്കിലും മനഃക്ളേശം എനിക്കുണ്ടാവുകയില്ല
എന്നു തന്നെയാണ്‌ എന്റെ തോന്നൽ.
എസ്ക്യൂപ്പുലാ ഗ്രാമത്തിനു തൊട്ടടുത്താണ്‌
എന്റെ സ്നേഹിതൻ റഫേൽ കൊർദോവയുടെ താമസം.
പണ്ടൊക്കെ കുഞ്ഞുശവപ്പെട്ടികളുമായി എത്ര വിലാപയാത്രകളാണ്‌
വഴിയിലൂടെ പോയിരുന്നതെന്ന് അയാളെന്നോടു പറഞ്ഞു:
എന്നും വൈകുന്നേരം നാലും അഞ്ചും ആറും എട്ടും മരണങ്ങൾ;
പ്രായമായവർ അത്ര മരിച്ചിരുന്നില്ല.
അല്പനേരം മുമ്പ് എസ്ക്യൂപ്പുലായിലെ കുഴിവെട്ടുകാരൻ
എന്നെ കാണാൻ വന്നിരുന്നു:
“ഡോക്ടറേ, ഒരു ചെറിയ സഹായം ചോദിക്കാനാണു ഞാൻ വന്നത്;
എനിക്കിപ്പോൾ പണിയൊന്നുമില്ല.
എസ്ക്യൂപ്പുലായിലിപ്പോൾ ശവസംസ്കാരങ്ങളില്ല.”
മുമ്പ് ബ്രായ്ക്കിത്ര വിലയുണ്ടായിരുന്നില്ല;
ഇപ്പോൾ എസ്ക്യൂപ്പുലായിൽ മരണങ്ങൾ തന്നെയില്ല.
ഇനി പറയൂ: ഏതാണു ഭേദം?
ഏണെസ്റ്റോ കാർഡിനൽ (ജനനം 1925)നിക്കരാഗ്വൻ കത്തോലിക്കാ പുരോഹിതനും കവിയും രാഷ്ട്രീയപ്രവർത്തകനും. വിമോചനദൈവശാസ്ത്രത്തിന്റെ വക്താവ്.
No comments:
Post a Comment