മഴയത്ത്‌
________
തെരുവിൽ ആളുകൾ തിരക്കിലാണ്‌,
തെരുവിൽ മഴ പെയ്യുകയാണ്‌,
മഴ പെയ്യുമ്പോൾ ആളുകൾ തിരക്കിലുമാണ്‌.
വീട്ടിൽ ആളുകൾക്കു വേണ്ടുവോളം സമയമുണ്ട്‌,
വീട്ടിലിരിക്കാൻ സുഖമാണ്‌,
മഴ പെയ്യുമ്പോൾ ആളുകൾക്കു സമയവുമുണ്ട്‌.
വീട്ടിലിരിക്കുന്ന ആളുകൾ
തെരുവിലെ ആളുകളെ നിരീക്ഷിക്കുന്നു.
മഴ പെയ്യുകയാണ്‌.
ജീവിതപരിപാടി
_______________
ആളുകൾക്കാഗ്രഹം സുഖജീവിതം നയിക്കാൻ,
ടീവീ കാണാൻ, കാറോടിക്കാൻ,
നഗരത്തിനു പുറത്ത്‌ ഒരു വീടു വാങ്ങാൻ.
ആളുകൾക്കാഗ്രഹം അന്യരെ സഹായിക്കാൻ,
തെരുവു മുറിച്ചുകടക്കാൻ കണ്ണുകാണാത്തൊരാളെ
സഹായിക്കാൻ.
ആളുകൾക്കാഗ്രഹം
അന്യർ തങ്ങളെക്കുറിച്ചു നല്ലതു പറഞ്ഞുകേൾക്കാൻ.
അവർക്കാഗ്രഹം വേദനകളൊന്നുമില്ലാതെ
ഏറെക്കാലം ജീവിക്കാൻ,
പിന്നെ അവർക്കാഗ്രഹമുണ്ട്‌
മരിക്കും മുമ്പ്‌ ഒരൽപം അമരത്വം കിട്ടിയാൽക്കൊള്ളാമെന്നും.
നാളെ അവർ പുറപ്പെടുകയാണ്‌
____________________________
സൂര്യനിലേക്കല്ല അവർ പുറപ്പെടുന്നത്‌,
അവർ പോകുന്നതു ചന്ദ്രനിലേക്കത്രെ.
എന്താണവർ ചന്ദ്രനിലേക്കു പോകുന്നത്‌?
സൂര്യനു കീഴിൽ പുതുതായിട്ടൊന്നുമില്ല എന്നതിനാൽ.
ചന്ദ്രനിലേക്കാണവർ പോകുന്നതെങ്കിൽ
സൂര്യനിലേക്കവർ പോകുന്നുമില്ല.
ചന്ദ്രനിൽ നിന്നവർ മടങ്ങിവരുന്നില്ലെങ്കിൽ
സൂര്യനു കീഴിൽ പുതുതായെന്തെങ്കിലും നടക്കുകയും ചെയ്യും.
നാളെയവർ പുറപ്പെടുകയാണ്‌.
(1965)
link to image
1 comment:
മഴ എഴുതുകയാണ്, ജീവിതങ്ങളെ
Post a Comment