ജീവിക്കാനെനിക്കു വേണ്ട
ദ്വീപുകൾ, കൊട്ടാരങ്ങൾ, ഗോപുരങ്ങളും.
എന്തൊരാനന്ദമെന്നോ,
സർവ്വനാമങ്ങളിൽ ജീവിക്കാൻ!
മേലുടുപ്പുകളിൽ നിന്നു മുക്തയാവുക നീ,
നിനക്കു വേണ്ട ചിഹ്നങ്ങൾ, മേലെഴുത്തുകളും;
മറ്റൊരാളായി വേഷമെടുത്തവൾ,
എന്നെന്നും മറ്റൊന്നിന്റെ സന്തതി:
ആ വിധമല്ലല്ലോ നിന്നെ ഞാൻ പ്രണയിക്കുന്നു.
എനിക്കു വേണ്ടവൾ ശുദ്ധ, മുക്ത,
വഴങ്ങാത്തവൾ: നീ.
ഈ ലോകത്തിലെ മനുഷ്യർക്കിടയിൽ
നിന്നെ ഞാൻ വിളിക്കുമ്പോൾ
എനിക്കറിയാം, നീയൊരാളേ നീയാവൂ.
വിളിക്കുന്നതാരെന്നു നീയെന്നോടു ചോദിക്കുന്നു,
'നിന്നെ തനിക്കു വേണമെന്നു കരുതുന്നൊരുവൻ.'
പേരുകൾ ഞാൻ കുഴിച്ചുമൂടും,
മേലെഴുത്തുകളും ചരിത്രവും,
പിറക്കും മുമ്പേ എനിക്കുമേൽ വലിച്ചെറിഞ്ഞ സർവ്വതും
തല്ലിപ്പൊട്ടിച്ചു പോകും ഞാൻ.
നഗ്നതയുടെ പേരില്ലാത്ത നിത്യതയിലേക്കു
മടങ്ങിപ്പോകും ഞാൻ,
കല്ലിൽ നിന്ന്, ലോകത്തിൽ നിന്ന്
നിന്നോടു പറയും ഞാൻ:
'ഇതു ഞാൻ. എനിക്കിഷ്ടം നിന്നെ.'
No comments:
Post a Comment