സൂര്യൻ
ഭൂമിക്കു മേൽ ചിറകു വിരുത്തിയ
സൂര്യനെ നോക്കൂ.
വേരുകളാകാശത്തും
മണ്ണിൽ ചില്ലകളുമായി
ഒരു മഹാവൃക്ഷം.
വീണ
പെൺകിടാവിന്റെ കൈകളിൽ
വീണ പാടുന്നതു കേൾക്കൂ:
അമ്മയുടെ കൈകളിൽ കിടന്നു
കുഞ്ഞു കരയുമ്പോലെ:
അവൻ കരയുമ്പോൾ
ചിരിച്ചുകൊണ്ടു പാടുകയാണവൾ!
മിന്നൽ
മേഘങ്ങളെ നോക്കി
മിന്നല്പിണർ പൊട്ടിച്ചിരിക്കുന്നു,
തളർച്ചയറിയാത്ത പടയാളിയെപ്പോലെ.
അഥവാ, ഉറക്കം തൂങ്ങുന്ന രാത്രികാവല്ക്കാരനെപ്പോലെ:
അയാൾ ഒരു നിമിഷം ഒരു കണ്ണു തുറക്കുന്നു,
പിന്നെയതടയ്ക്കുന്നു.
യൂദാ അൽ-ഹാരിസി(1160-1230)- നിത്യസഞ്ചാരിയായ ഹീബ്രു കവിയും പണ്ഡിതനും.
No comments:
Post a Comment