ജ്യോർജി ഇവാനോവ് - നന്നായി...

---

സാറെന്നൊരാളില്ലാത്തതു നന്നായി.
റഷ്യ എന്നൊന്നില്ലാത്തതു നന്നായി.
നന്നായി, ദൈവമെന്നൊരാളില്ലാത്തതും.

മഞ്ഞക്കാമല പിടിച്ച സന്ധ്യ മാത്രം.
മഞ്ഞുപരലു പോലെ നക്ഷത്രങ്ങൾ മാത്രം.
എണ്ണിയാലൊടുങ്ങാത്ത വർഷങ്ങൾ മാത്രം.

നന്നായി, യാതൊരാളുമില്ലെന്നായത്,
നന്നായി, യാതൊന്നുമില്ലെന്നായത്,
ഇത്ര നിർജ്ജീവവും ഇരുണ്ടതുമായി,

ഇതിലധികം നിർജ്ജീവമാവാനില്ലെന്നായത്,
ഇതിലധികമിരുണ്ടതാവാനില്ലെന്നായത്,
നമ്മെത്തുണയ്ക്കാനാരുമില്ലെന്നായത്,
ആരുടെ തുണ കൊണ്ടും കാര്യമില്ലെന്നായത്.

(1930)

---

ജ്യോർജി ഇവാനോവ്(1894-1958)- റഷ്യൻ മിനിമലിസ്റ്റ് കവി.