പുഷ്കിൻ - ഒരു കുഞ്ഞിക്കിളി

link to image

ഒരന്യദേശത്തു പ്രവാസിയായിക്കഴിയുമ്പോഴും
നാട്ടിലെച്ചടങ്ങുകൾ ഞാൻ മുടക്കിയിരുന്നില്ല;
അങ്ങനെയന്നൊരു വസന്താരംഭവേളയിൽ
ഒരു കുഞ്ഞിക്കിളിയെ ഞാൻ കൂടു തുറന്നു വിട്ടു.

എന്റെ നെഞ്ചു സമാധാനം കൊണ്ടു നിറഞ്ഞു:
എന്തിനു ഞാൻ ദൈവേച്ഛയോടു കലഹിക്കണം,
അവന്റെ സൃഷ്ടികളിലെളിയതെങ്കിലുമൊന്നിനെ
സ്വാതന്ത്ര്യം രുചിപ്പിക്കാനെനിക്കു കഴിഞ്ഞുവെങ്കിൽ?

(1822)

തുറന്നുവിട്ട കിളി എന്ന വിഷയത്തെക്കുറിച്ച് മറ്റു കവിസുഹൃത്തുമൊത്തു നടത്തിയ കവിതാമത്സരത്തിൽ എഴുതിയ ആദ്യകാലരചന. “ഈസ്റ്റർ നാളിൽ ഒരു കിളിക്കുഞ്ഞിനെ തുറന്നുവിടുന്ന റഷ്യൻ ഗ്രാമങ്ങളിലെ ഹൃദയസ്പർശിയായ ചടങ്ങി”നെക്കുറിച്ച് പുഷ്കിൻ ഒരു കത്തിൽ എഴുതുന്നുണ്ട്.