ബോദ്‌ലെയെർ- ഒരു കോമാളി

 

പുതുവത്സരം പൊട്ടിപ്പുറപ്പെട്ടിരിക്കുകയാണ്‌; ചെളിയും മഞ്ഞും കുഴഞ്ഞ മണ്ണിൽ കളിപ്പാട്ടങ്ങളും മിഠായികളുമലങ്കരിച്ച, മോഹങ്ങളും നൈരാശ്യങ്ങളും കുത്തിനിറച്ച ഒരായിരം വണ്ടികൾ ചാലുകീറിയിരിക്കുന്നു. ഒരു മഹാനഗരത്തിന്റെ ഔദ്യോഗികജ്വരം; ഏതു വൈരാഗിയുടെയും ഉള്ളുലയ്ക്കുമത്‌.

ആ ബഹളത്തിനും തിരക്കിനുമിടയിലൂടെ ഒരു പൊണ്ണന്റെ ചാട്ടയടിയുമേറ്റ്‌ നടന്നുപോവുകയാണ്‌ ഒരു കഴുത.
അത്‌ അടുത്ത തിരിവു കടക്കാൻ തുടങ്ങുമ്പോൾ ഒരു മാന്യദേഹം, കൈയ്യുറകൾ ധരിച്ചവൻ,ആകെ വെടിപ്പുറ്റവൻ,നിർദ്ദയമായ ഒരു ടൈ കുടുക്കിയവൻ, ഉടവു തട്ടാത്ത കോട്ടും സൂട്ടും തടവിൽ പിടിച്ചവൻ ആ സാധുമൃഗത്തിനു മുന്നിൽ ഉപചാരത്തോടെ തല കുമ്പിട്ടുകൊണ്ട്‌ ഇങ്ങനെ പറഞ്ഞു:"അവിടുത്തേക്ക്‌ പുതുവത്സരാശംശകളുണ്ട്‌!" എന്നിട്ടയാൾ ആത്മസംതൃപ്തി തുളുമ്പുന്ന ഒരു ഭാവത്തോടെ തിരിഞ്ഞ്‌ തന്റെ കൂടെ വന്നവരെ ഒന്നു നോക്കി, അവരുടെ അംഗീകാരം കൂടി കിട്ടിയാലേ തന്റെ തൃപ്തി പൂർണ്ണമാകൂ എന്നപോലെ.

കഴുതയാവട്ടെ ആ കോമാളിയെ കാണാതെ തന്റെ ചുമടും പേറി നടന്നുപോവുകയും ചെയ്തു.

എന്റെയുള്ളിൽ ആ ജളപ്രഭുവിന്റെ നേർക്ക്‌ വന്ധ്യമായൊരു രോഷം ഇരച്ചുകേറി; ഫ്രഞ്ചുകാരന്റെ ഫലിതബോധത്തിന്റെ ആകത്തുകയാണയാളെന്ന് എനിക്കു തോന്നിപ്പോയി.