അന്ന അഹ് മാത്തൊവ –പവിത്രമായൊരതിർത്തിയുണ്ട് തമ്മിലടുത്തവർക്കിടയിൽ...

---

പവിത്രമായൊരതിർത്തിയുണ്ട് തമ്മിലടുത്തവർക്കിടയിൽ...

---

പവിത്രമായൊരതിർത്തിയുണ്ട് തമ്മിലടുത്തവർക്കിടയിൽ,
കടക്കുകയുമരുതതു പ്രണയം കൊണ്ടോ, വികാരം കൊണ്ടോ-
ഭയാനകമായ മൌനത്തിൽ ചുണ്ടുകളുരുകിച്ചേർന്നാലും,
പ്രണയം കൊണ്ടു ഹൃദയം നൂറുനൂറായി നുറുങ്ങിയാലും.

ആത്മാവു കെട്ടുപാടുകളറുക്കുമ്പോൾ,
ആസക്തിയുടെ അലസനിർവേദത്തോടതു മുഖം തിരിക്കുമ്പോൾ,
നിസ്സഹായമാണു സൗഹൃദമിവിടെ,
ആണ്ടുകൾ കൊണ്ടാടിയ ഉത്കടാനന്ദങ്ങളും.

ഉന്മാദികൾ- അതിലേക്കെത്താനോങ്ങുന്നവർ,
അതിലേക്കെത്തിയവർ- ശോകത്തിന്റെ പ്രഹരമേറ്റവർ...
ഇനി നിനക്കറിയുമല്ലോ, നിന്റെ കൈകൾ ലാളിക്കുമ്പോൾ
എന്റെ ഹൃദയമതിദ്രുതം മിടിയ്ക്കാത്തതെന്തെന്നും?
1915 മേയ്

---

ഹാ, കുളിരുന്നൊരു നാളായിരുന്നത്...

---

ഹാ, കുളിരുന്നൊരു നാളായിരുന്നത്,
പീറ്ററിന്റെ വിസ്മയനഗരത്തിൽ!
രക്തജ്വാല പോലസ്തമയം,
പതിയെ കനക്കുന്ന നിഴലുകൾ.
അവൻ കൊതിക്കരുതെന്റെ കണ്ണുകളെ,
പ്രവചിക്കുന്ന നിശിതദൃഷ്ടികളെ.
അവനു കിട്ടട്ടെയൊരായുസ്സിന്റെ കവിതകൾ,
എന്റെയുദ്ധതാധരങ്ങളുടെ പ്രാർത്ഥനകൾ.
1913

---

ഒരു ഹൃദയത്തോടു  കൊളുത്തിയിട്ടില്ല  മറ്റൊന്നിനെ...

---

ഒരു ഹൃദയത്തോടു  കൊളുത്തിയിട്ടില്ല  മറ്റൊന്നിനെ,
നിങ്ങൾക്കിഷ്ടമതാണെങ്കിൽ- പൊയ്ക്കോളൂ!
ആഹ്ളാദങ്ങൾ പലതും കാത്തിരുപ്പുണ്ടാവും
കെട്ടുപാടുകളില്ലാത്തൊരാളെ.
കരയുകയല്ല ഞാൻ, വിലപിക്കുകയല്ല ഞാൻ,
ആനന്ദമെനിക്കു പറഞ്ഞതുമല്ല.
ചുംബിക്കയുമരുതെന്നെ-
മരണമുണ്ടെന്നെച്ചുംബിക്കാൻ.
ഹേമന്തത്തിന്റെ മഞ്ഞിനൊപ്പം
വൈരസ്യം കാരുന്ന നാളുകൾ.
എന്തിന്‌, ഹാ, എന്തിനു നീ ഭേദമാകണം,
ഞാൻ വരിച്ചൊരുവനെക്കാൾ?
1911

---

ചിത്രം - ഒഡേസയിലെ ആഹ് മാത്തോവാസ്മാരകം (വിക്കിമീഡിയ)

---