അഹമ്മദ്‌ ഫാരാസ്‌ - വചനത്തിന്റെ കുരിശേറ്റം

വരൂ,
നാം ക്രൂശിച്ച ക്രിസ്തുവിന്റെ
രക്താഭിഷിക്തമായ ജഡത്തെച്ചൊല്ലി
നമുക്കു വിലപിക്കാം,
നമുക്കു നിലവിളിക്കാം;
നമ്മെ ഏൽപ്പിച്ച ജോലി
നാം ഭംഗിയായി ചെയ്തുതീർത്തുവല്ലോ.
ഇനി കണക്കു തീർക്കേണ്ട നേരമായി.

ചെരിപ്പുകൾ
കുരിശു പണിഞ്ഞവനെടുത്തോട്ടെ;
ശവക്കച്ച കവചമണിയിച്ചവനുള്ളത്‌;
മുൾക്കിരീടം
കണ്ണിൽ കണ്ണീരുള്ളവനർഹതപ്പെട്ടതത്രേ.

വരൂ,
ഇനി നമ്മുടെ അവകാശം സ്ഥാപിക്കാം.
നാമൊക്കെ ക്രിസ്തുവത്രേ.
മരിച്ചവരെ ജീവിപ്പിക്കാനാവുമെന്ന്
നമുക്കു തെളിയിക്കണം.
പക്ഷേ അവന്റെ വചനമായിരുന്നു എല്ലാം.
വചനമെവിടെ?
*