തിരയിളകുന്നൊരു പട്ടുടയാടയിലവൾ നടന്നുപോകുമ്പോൾ
നൃത്തച്ചുവടു വയ്ക്കുകയാണവളെന്നു നിങ്ങൾക്കു തോന്നും;
പാമ്പാട്ടിയുടെ ദണ്ഡിളകുമ്പോളതിന്റെ താളത്തിൽ
പത്തി വിടർത്തിയാടുന്ന നെടിയ നാഗങ്ങളെപ്പോലെ.
മരുനിലങ്ങളിലെ വിവർണ്ണമായ മണൽത്തരികളെപ്പോലെ,
മനുഷ്യയാതനയോടുദാസീനമായ നീലമാനത്തെപ്പോലെ;
കടൽപ്പെരുക്കത്തിൽ തിരകളുടെ ദീർഘവിധാനം പോലെ,
അലസമായൊരനാസ്ഥയവളെടുത്തുവീശുന്നു.
കടഞ്ഞെടുത്ത മരതകങ്ങളാണവളുടെ കണ്ണുകൾ.
പ്രാക്തനം, പ്രതീകാത്മകം, അഭേദ്യമാണവളുടെ പ്രകൃതം,
അതിൽ കുടിയേറിരിക്കുന്നു, മാലാഖയുമൊരു സ്ഫിങ്ക്സും.
സർവതും പൊന്നുമുരുക്കും വെളിച്ചവും വജ്രവുമായൊരിടത്തിൽ
നിരുപയോഗമായൊരു വിദൂരനക്ഷത്രം പോലാളിക്കത്തുന്നു,
നിർവികാരയായൊരു സ്ത്രീയുടെ തണുത്ത ധാർഷ്ട്യം.
പാപത്തിന്റെ പൂക്കൾ - 28
No comments:
Post a Comment