അറയ്ക്കുന്നൊരു ജൂതത്തിയ്ക്കരികിലൊരുരാത്രി ഞാൻ കിടന്നു,
ഒരു ശവത്തിനരികിൽ മറ്റൊരു ശവത്തെപ്പോലെ;
ആ മലിനവസ്തുവിനടുത്തു കിടക്കെ ഞാനോർമ്മിച്ചുപോയി,
എന്റെ തൃഷ്ണകളെ വിഫലമാക്കിയൊരു ദാരുണസൗന്ദര്യത്തെ.
അവളുടെ നിസർഗപ്രതാപത്തെ ഞാൻ മനസ്സിൽ കണ്ടു,
പ്രബലവും സുഭഗവുമായ കടാക്ഷം ഞാൻ കണ്ടു,
ഓർമ്മകൾ കൊണ്ടുതന്നെ പ്രണയദാഹമുണർത്തുന്ന
വാസനച്ചെപ്പു പോലത്തെ മുടിത്തഴപ്പും ഞാൻ കണ്ടു.
ഉത്കടാവേശത്തോടെ നിന്നെ ഞാൻ ചുംബിച്ചേനേ,
തണുത്ത കാലടി തൊട്ടു തഴച്ചിരുണ്ട മുടി വരെയ്ക്കും
ഊഷ്മളാശ്ളേഷങ്ങൾ കൊണ്ടു നിന്നെ ഞാൻ പൊതിഞ്ഞേനേ,
ഒരേയൊരു കണ്ണുനീർത്തുള്ളി കൊണ്ടൊരു രാത്രിയെങ്കിലും
നിന്റെ കണ്ണുകളുടെ ജ്വലനത്തെ, അതിനിന്ധനമായ ശൈത്യത്തെ,
ക്രൂരയായ റാണീ, നീയൊന്നു കെടുത്തിയെങ്കിൽ!
പാപത്തിന്റെ പൂക്കൾ- 34
പാപത്തിന്റെ പൂക്കൾക്ക് പ്രശസ്ത ചിത്രകാരനായ ഹെൻറി മത്തീസേ തയാറാക്കിയ കവർ
No comments:
Post a Comment