ചെറുപ്പക്കാരനായ ഒരു പേഴ്സ്യൻ തോട്ടക്കാരൻ രാജാവിനോടായി ഇങ്ങനെ പറഞ്ഞു:
“രക്ഷിക്കണേ! ഇന്നു രാവിലെ തോട്ടത്തിൽ വച്ചു ഞാൻ മരണത്തെ കണ്ടു; അവനെന്നെ പേടിപ്പിക്കുന്നൊരു നോട്ടം നോക്കി. ഇന്നു രാത്രി തന്നെ വല്ല വിധേനയും അങ്ങു ദൂരെ ഇസ്ഫഹാനിലെത്തിയാൽ മതിയായിരുന്നു.”
രാജാവ് അയാൾക്ക് തന്റെ ഏറ്റവും വേഗതയുള്ള കുതിരയെ വിട്ടുകൊടുത്തു.
അന്നുച്ച തിരിഞ്ഞ് തോട്ടത്തിൽ ഉലാത്തുമ്പോൾ രാജാവു നേരേ മുന്നിൽ മരണത്തെ കണ്ടു. “അങ്ങെന്തിനാണ്‌ ഇന്നു രാവിലെ എന്റെ തോട്ടക്കാരനെ നോക്കിപ്പേടിപ്പിച്ചത്?” രാജാവു ചോദിച്ചു.
“ഞാൻ അയാളെ പേടിപ്പിച്ചതൊന്നുമല്ല; ഞാൻ അത്ഭുതപ്പെട്ടു നോക്കിയതാണ്‌,” മരണം പറഞ്ഞു. “ഇന്നു രാത്രിയിൽ ഇസ്ഫഹാനിൽ വച്ച് എന്റെ പിടിയിലാവേണ്ടയാളെ രാവിലെ ഇവിടെ കണ്ടപ്പോൾ ഞാനൊന്നത്ഭുതപ്പെട്ടുവെന്നേയുള്ളു.”
No comments:
Post a Comment