ശിലാദൈവം
നിങ്ങൾ നിങ്ങൾക്കുള്ളിൽ
ഒരു ശിലാദൈവത്തെ പേറിനടക്കുന്നു.
നിങ്ങളവനു സേവ ചെയ്യുന്നു,
ഒളിവായി നിവേദ്യങ്ങളർപ്പിക്കുന്നു.
ചോര പുരണ്ട കൈകളിൽ
നിങ്ങളവനായി കൊണ്ടുചെല്ലുന്നു,
പൂച്ചെണ്ടുകളും കത്തിച്ച മെഴുകുതിരികളും.
എന്നിട്ടും നിങ്ങൾക്കറിയാം,
നിങ്ങളുടെ ഹൃദയത്തിൽ
അവന്റെ ശൈത്യം,
നിങ്ങളുടെ നിശ്വാസം
അവന്റേതുപോലെ കല്ലിയ്ക്കുന്നതും,
നിങ്ങളുടെ മന്ദഹാസം
അവന്റേതുപോലെ വെറുങ്ങലിക്കുന്നതും.
ഗാനമേ, ഹൃദയത്തിലമർത്തിച്ചവിട്ടരുതേ...
ഗാനമേ, ഹൃദയത്തിലമർത്തിച്ചവിട്ടരുതേ,
മൃദുപദങ്ങൾ വച്ചുവരൂ,
ചതുപ്പിൽ മണിപ്പൂവുകൾ പോലെ,
രാത്രി പെയ്ത മഞ്ഞിൽ കിളികളെപ്പോലെ.
നോവിന്റെ പുറംപാളിയടർന്നാൽ
നീ മുങ്ങിത്താഴുമേ, ഗാനമേ.
No comments:
Post a Comment