തോഴനെ വഴിയിൽ കാണുമ്പോൾ
അവന്റെ കാതിൽ മന്ത്രിക്കൂ
ആത്മാവിന്റെ രഹസ്യങ്ങൾ.
കാണുന്നതൊരു പനിനീർപ്പൂവെങ്കിൽ
പാടിത്തിമിർക്കുക കുയിലിനെപ്പോലെ.
*
ഏതു കുതിരയ്ക്കുമൊരു ലായമുണ്ട്,
ഏതു കന്നിനുമൊരു തൊഴുത്തുണ്ട്,
ഏതു കിളിയ്ക്കുമൊരു കൂടുണ്ട്.
എല്ലാമറിഞ്ഞു ദൈവവുമുണ്ട്.
*
എരിയുന്ന വള്ളിപ്പടർപ്പു കാണുന്നു
മോശയെപ്പോലെ നിങ്ങൾ.
അതിൽ നിന്നൊരു തീപ്പൊരിക്കായി
ചെല്ലുന്ന നിങ്ങൾ കാണുന്നു
അനന്തകോടി സൂര്യോദയങ്ങൾ,
അത്രയുമസ്തമയങ്ങളും.
*
പുറമേ നിന്നകമേ നോക്കുന്നതാര്‌?
മറിഞ്ഞ മനങ്ങൾക്കുള്ളിൽപോലും
അത്രയും രഹസ്യങ്ങൾ കാണുന്നതാര്‌?
*
No comments:
Post a Comment