യഹൂദാ അമിച്ചായി - പ്രണയത്തിനു പൂർത്തിയായിരിക്കുന്നു...

---

പ്രണയത്തിനു പൂർത്തിയായിരിക്കുന്നു...

---

പ്രണയത്തിനു വീണ്ടും പൂർത്തിയായിരിക്കുന്നു,
ലാഭകരമായൊരു മാമ്പഴക്കാലം പോലെ,
മറവിയിൽപ്പെട്ടുകിടക്കാൻ കൊതിച്ച പ്രക്ഷുബ്ധവസ്തുകളെ
ഭൂമിയ്ക്കടിയിൽ നിന്നു കിളച്ചെടുത്ത പുരാവസ്തുഖനനം പോലെ.

പ്രണയത്തിനു വീണ്ടും പൂർത്തിയായിരിക്കുന്നു.
ഉയരമുള്ളൊരു കെട്ടിടം പൊളിച്ചിറക്കി
അവശിഷ്ടങ്ങൾ വാരിമാറ്റുമ്പോൾ
ഒഴിഞ്ഞ ചതുരത്തിൽ നിന്നുകൊണ്ടു നിങ്ങൾ പറയുന്നു:
എത്ര ചെറിയൊരിടത്താണ്‌
ഇത്രയധികം നിലകളും ആളുകളുമായി
ആ കെട്ടിടം നിന്നത്.

ദൂരെ താഴ്വരയിൽ നിന്നു നിങ്ങളുടെ കാതുകളിലേക്കെത്തുന്നുമുണ്ട്
ഒറ്റയ്ക്കു പണിയെടുക്കുന്ന ഒരു ട്രാക്റ്ററിന്റെ ശബ്ദം,
വിദൂരമായൊരു ഭൂതകാലത്തിൽ നിന്ന്
ഒരു കവിടിപ്പിഞ്ഞാണത്തിൽ തട്ടിക്കിലുങ്ങുന്ന
ഒരു ഫോർക്കിന്റെ ശബ്ദം,
കുഞ്ഞിനു കൊടുക്കാൻ മുട്ടയും പഞ്ചാരയും കടയുന്ന
കടകടശബ്ദം.

---

നമ്മുടെയുടലുകളുടെ പാടുകൾ പോലെ

---

നമ്മുടെയുടലുകളുടെ പാടുകൾ പോലെ
യാതൊന്നും ശേഷിക്കില്ല
ഈയിടത്തു നാമുണ്ടായിരുന്നതിനടയാളമായി.
നമുക്കു പിന്നിൽ ലോകമടഞ്ഞുകൂടുന്നു,
പൂഴിമണ്ണു നീണ്ടുനിവരുന്നു.

നീയില്ലാത്ത നാളുകൾ
കാഴ്ചയിൽ വന്നുതുടങ്ങുന്നു,
നാമിരുവർക്കും മേൽ പൊഴിയാത്ത മഴയുടെ മേഘങ്ങളെ
കാറ്റടിച്ചുപാറ്റുന്നു.

കപ്പലുകളിലെ യാത്രക്കാരുടെ പട്ടികയിൽ
നിന്റെ പേരു വന്നുകഴിഞ്ഞു,
പേരു കേട്ടാൽത്തന്നെ നെഞ്ചു കിടുങ്ങുന്ന
ഹോട്ടലുകളുടെ രജിസ്റ്ററുകളിലും.
എനിക്കറിയുന്ന മൂന്നു ഭാഷകൾ,
ഞാൻ കാണുകയും സ്വപ്നം കാണുകയും ചെയ്യുന്ന
മൂന്നു നിറങ്ങൾ:

ഒന്നും എന്നെ തുണയ്ക്കില്ല.

---