ഇനി നാമൊറ്റയ്ക്കായ സ്ഥിതിയ്ക്ക് രാജകുമാരാ ആണുങ്ങളെപ്പോലെ നമുക്കു നേരിട്ടു സംസാരിക്കാം
നടക്കല്ലുകളിൽ വീണുകിടക്കുകയാണു നീയെങ്കിലും ചത്തൊരുറുമ്പിനെയല്ലാതെ
രശ്മികളുടഞ്ഞൊരു സൂര്യനെയല്ലാതെ മറ്റൊന്നും നീ കാണുന്നില്ലെങ്കിലും
ഒരു പുഞ്ചിരിയോടല്ലാതെ നിന്റെ കൈകളെക്കുറിച്ചോർത്തിട്ടില്ല ഞാൻ
നിലം പറ്റിയ കിളിക്കൂടുകൾ പോലെ ഇന്നവ കല്ലുകളിൽ വീണുകിടക്കുന്നു
പണ്ടേപ്പോലെ നിരാലംബമാണിന്നുമവ അന്ത്യമെന്നതിതുതന്നെ
കൈകൾ വേറിട്ടു കിടക്കുന്നു വാളു വേറിട്ടു കിടക്കുന്നു തല വേറെ
സൈനികന്റെ കാലടികൾ പതുപതുത്ത വള്ളിച്ചെരുപ്പുകളിലും
നിനക്കൊരു സൈനികന്റെ ശവസംസ്കാരം ലഭിക്കും സൈനികനായിട്ടില്ലാത്ത നിനക്ക്
എനിക്കല്പം പരിചയമുള്ള ഒരേയൊരു ചടങ്ങ്
മെഴുകുതിരികളുണ്ടാവില്ല ഗായകരുണ്ടാവില്ല പീരങ്കിവെടികൾ മാത്രം
പാതയിൽ വലിച്ചിഴയ്ക്കുന്ന കരിന്തുണികൾ ഹെൽമറ്റുകൾ ബൂട്ടുകൾ വെടിക്കോപ്പുകൾ
പെരുമ്പറകൾ മുന്തിയതൊന്നും ഞാനറിഞ്ഞിട്ടില്ല
ഇതൊക്കെയാവും ഞാൻ ഭരണം തുടങ്ങും മുമ്പേ എന്റെ നടപടികൾ
നഗരത്തെ പിടലിയ്ക്കു പിടിച്ചൊന്നു കുലുക്കിയുണർത്തണം
എന്തായാലും നീ മരിക്കാനുള്ളവനായിരുന്നു ഹാംലറ്റ് ജീവിതം നിനക്കു പറഞ്ഞിരുന്നില്ല
നിനക്കു വിശ്വാസം ചില്ലു കൊണ്ടുള്ള ധാരണകളെയായിരുന്നു കളിമണ്ണു കൊണ്ടുള്ള മനുഷ്യരെയായിരുന്നില്ല
ഉറക്കത്തിലെന്നപോലെ എന്നും നീ കോച്ചിവലിച്ചിരുന്നു വ്യാളികളെ നായാടി നീ
ചെന്നായ്ക്കളുടെ ആർത്തിയോടെ നീ വായു കടിച്ചുപൊട്ടിച്ചു തിന്നു പിന്നെ ഛർദ്ദിക്കാൻ മാത്രം
മനുഷ്യന്റേതായിട്ടൊന്നും നീയറിഞ്ഞിരുന്നില്ല ശ്വാസമെടുക്കാൻ പോലും നിനക്കറിയില്ലായിരുന്നു
നിനക്കിപ്പോൾ സമാധാനമായി ഹാംലറ്റ് നിന്റെ കടമ നീ നിറവേറ്റി
നിനക്കു സമാധാനവുമായി ശേഷിച്ചതു മൗനമല്ല എനിക്കുള്ളതാണത്
എളുപ്പമുള്ളതു നീ തെരഞ്ഞെടുത്തു നാടകീയമായൊരു കുത്തിക്കയറ്റൽ
എന്താണു പക്ഷേ വീരചരമം ഇടുങ്ങിയൊരു കസേരയിൽ
കൈയിലൊരു തണുത്ത ആപ്പിളുമായി ചിതൽപ്പുറ്റും കണ്ട്
ഘടികാരമുഖവും നോക്കിയുള്ള നിതാന്തജാഗ്രതയുമായി നോക്കുമ്പോൾ
വിട രാജകുമാരാ എനിക്കു പിടിപ്പതു പണിയുണ്ട് ഒരോവുചാലിന്റെ നിർമ്മാണം
യാചകരെയും വേശ്യകളെയും സംബന്ധിച്ചൊരു ശാസനം
ജയിൽ പരിഷ്കാരത്തെക്കുറിച്ചും ചിന്തിക്കാനുണ്ട്
ഡെന്മാർക്ക് ഒരു തടവറയാണെന്ന് കൃത്യമായി നീ നിരീക്ഷിച്ചിട്ടുമുണ്ടല്ലോ
എന്റെ കാര്യങ്ങൾക്കായി ഞാൻ പോകുന്നു
ഈ രാത്രിയിൽ ഹാംലറ്റ് എന്നു പേരായി ഒരു നക്ഷത്രം പിറന്നിരിക്കുന്നു
ഒരിക്കലും നാം കണ്ടുമുട്ടില്ല ഞാൻ വിട്ടുപോകുന്നത്
ഒരു ദുരന്തനാടകത്തിനു പറ്റിയ വിഷയവുമല്ല
തമ്മിൽ അഭിവാദ്യം പറയേണ്ടവരല്ല നാം വിട പറയേണ്ടവരുമല്ല
നാം ജീവിക്കുന്നതു തുരുത്തുകളിൽ
ആ വെള്ളം ഈ വാക്കുകൾ അവയ്ക്കെന്തു ചെയ്യാനാവും
അവയ്ക്കെന്തു ചെയ്യാനാവും രാജകുമാരാ
link to image
No comments:
Post a Comment