റിൽക്കെ - പുലി

അഴിയെണ്ണിത്തളർന്നിരിക്കുന്നവന്റെ നോട്ടം,

ഇന്നതിൽത്തങ്ങുന്നില്ല യാതൊന്നും.

ആയിരങ്ങളാണഴികളെന്നവനു തോന്നുന്നു,

അഴികൾക്കപ്പുറമില്ലൊരു ലോകമെന്നും.

ഇടുങ്ങിച്ചുരുങ്ങുന്ന വട്ടങ്ങളിലവൻ ചുറ്റിനടക്കവെ

ആ മൃദുപാദപതനങ്ങളുടെ ബലിഷ്ഠതാളം

പ്രബലമായൊരിച്ഛാശക്തി കല്ലിച്ചുനില്ക്കുന്ന

മദ്ധ്യബിന്ദുവിനു ചുറ്റുമൊരനുഷ്ഠാനനൃത്തം.

ചിലനേരം ആ കൃഷ്ണമണികളുടെ മറ മാറുന്നു,

അപ്പോഴൊരു ചിത്രമുള്ളിൽക്കടക്കുന്നു,

പിടഞ്ഞ പേശികളുടെ നിശ്ചലതയിലൂടിരച്ചുപായുന്നു,

ഹൃദയത്തിനുള്ളറയിൽച്ചെന്നുവീണണയുന്നു.

(പാരീസിലെ സസ്യോദ്യാനത്തിൽ)

(1907)