റൂമി-പുതിയ നിയമം

പുതിയ നിയമം

കുടിയന്മാർ വഴക്കടിയ്ക്കും, തല്ലുപിടിയ്ക്കും,
അതു പഴയ നിയമം.
കാമുകനും മോശമല്ല, പക്ഷേ.
ചങ്ങാതി ചെന്നൊരു കുഴിയിൽ വീഴുന്നു.
അവിടെക്കിടന്നു പരതുമ്പോൾ
കൈയിൽത്തടയുന്നു തിളങ്ങുന്നതെന്തോ.
അതിന്റെ വിലയ്ക്കൊക്കില്ല,
ഏതു ധനവുമധികാരവും.

ഇന്നലെ രാത്രിയിൽ തെരുവിനു മേൽ
ആടകളുരിഞ്ഞിട്ടുംകൊണ്ടു ചന്ദ്രൻ വന്നു.
ഇതു പാടാനുള്ള നേരമെന്ന ചിന്തയോടെ
മാനത്തിന്റെ കുടുവൻകിണ്ണത്തിലേക്കു ഞാനെടുത്തുചാടി.
കിണ്ണമുടഞ്ഞു. വീഴുന്നെന്തുമെങ്ങും.
ഇനിയൊന്നുമില്ലല്ലോ ചെയ് വാനായി.

ഇതത്രേ പുതിയ നിയമം:
മദ്യകുംഭമുടയ്ക്കുക,
കുംഭാരന്റെ ചക്രത്തിൽച്ചെന്നു വീഴുക.

കത്തിത്തീരുന്ന മെഴുകുതിരി

ആളുന്ന ജ്വാലയായിട്ടൊടുങ്ങണം,
മെഴുകുതിരിയ്ക്കു വിധിച്ചതത്.
ഉന്മൂലനത്തിന്റെയാ മുഹൂർത്തത്തിൽ
നിഴലും വീഴ്ത്തുകയില്ലത്.

ഒരഭയത്തിന്റെ കഥ പറയുന്ന
തീനാവുമാത്രമത്.

കത്തിത്തീരുന്ന മെഴുകുതിരിയെ
ഇതുമാതിരിയൊന്നു നോക്കൂ:
നന്മയും തിന്മയും വെടിഞ്ഞൊരാൾ,
അയാൾക്കു വേണ്ട
അതിന്റെയന്തസ്സും, നാണക്കേടും.