അന്നാ ആഹ് മാത്തോവാ - സരളമായൊരു ജീവിതം

---

സരളമായൊരു ജീവിതം, ലോകവുമുണ്ടെവിടെയോ,
സുതാര്യം, ഊഷ്മളം, ആനന്ദമയം...
സന്ധ്യയ്ക്കു വേലി മേൽ ചാഞ്ഞുനിന്നും കൊണ്ടൊരാൾ
അയല്ക്കാരിയോടു കുശലം ചോദിക്കുന്നുണ്ടവിടെ;
തേനീച്ചകൾക്കു മാത്രം  കാതുകളിൽ കേട്ടുവെന്നുവരാം
അത്രയും സൗമ്യമായൊരാപ്രണയമന്ത്രണം.

നാം ജീവിക്കുന്നതു പക്ഷേ, ചടങ്ങൊപ്പിച്ചും ക്ളേശിച്ചും;
തുടക്കമിട്ടൊരു വാചകത്തെപ്പൊടുന്നനേ
താന്തോന്നിക്കാറ്റു വന്നു പൊട്ടിച്ചിടുമ്പോൾ
കയ്ച്ചുപോയൊരു കൂടിക്കാഴ്ചയ്ക്കുദകക്രിയയും ചെയ്യുന്നു നാം.

എന്തു തന്നാലും പകരം കൊടുക്കില്ല നാം പക്ഷേ,
കീർത്തിയുടെ, അത്യാഹിതത്തിന്റെ ഈ കരിങ്കൽനഗരത്തെ,
മഞ്ഞുപാളി മിന്നിയൊഴുകുന്ന പെരുമ്പുഴകളെ,
വെയിലു വീഴാത്ത മ്ളാനമായ പൂന്തോപ്പുകളെ,
കാതിൽപ്പെടാനില്ലാത്ത കാവ്യദേവതയുടെ ഗാനത്തെ.

---

1915 ജൂൺ 23

---

link to Akhmatova

---