റില്‍ക്കെ - നിറങ്ങൾ

---

---

ചെമന്ന പനിനീർപ്പൂക്കളിത്രയും ചെമന്നു കണ്ടിട്ടില്ലിതേവരെ,
മഴയുടെ മേലാടയെടുത്തണിഞ്ഞ ആ സായാഹ്നത്തിലെന്നപോലെ.
മിനുസം നിന്റെ മുടിയെക്കുറിച്ചോർത്തിരുന്നു ഞാനേറെനേരം...
ചെമന്ന പനിനീർപ്പൂക്കളിത്രയും ചെമന്നു കണ്ടിട്ടില്ലിതേവരെ.

കാട്ടുപൊന്തകളിത്രയും പച്ചയോടിരുണ്ടു കണ്ടിട്ടില്ലിതേവരെ,
മഴ പൊഴിയുന്ന വേളയിലാ സായാഹ്നത്തിലെന്നപോലെ.
നിന്റെ മൃദുലവേഷത്തെക്കുറിച്ചോർത്തിരുന്നു ഞാനേറെനേരം.
കാട്ടുപൊന്തകളിത്രയും പച്ചയോടിരുണ്ടു കണ്ടിട്ടില്ലിതേവരെ.

ഭൂർജ്ജവൃക്ഷങ്ങൾ കൊലുന്നനേയിത്ര വെളുത്തുനിന്നിട്ടില്ലിതേവരെ,
മഴയിരുണ്ടുപെയ്തൊരാ സായാഹ്നത്തിലെന്നപോലെ.
പിന്നെയാണു വടിവൊത്തതായി നിന്റെ കൈകൾ ഞാൻ കാണുന്നതും...
ഭൂർജ്ജവൃക്ഷങ്ങൾ കൊലുന്നനേയിത്ര വെളുത്തുനിന്നിട്ടില്ലിതേവരെ.

ചിറയിലൊരു കറുത്ത ദേശം പ്രതിഫലിച്ചു കണ്ടു ഞാനന്നവിടെ,
അതേ സായാഹ്നനേരത്ത്, മഞ്ഞു പോലെ മഴ മൂടിയ വേളയിൽ;
നിന്റെ കണ്ണുകളിലെന്നെ ഞാൻ തിരിച്ചറിഞ്ഞതുമങ്ങനെ...
ചിറയിലൊരു കറുത്ത ദേശം പ്രതിഫലിച്ചുകണ്ടു ഞാനന്നവിടെ.

1900 സെപ്തംബര്‍ 9

---

(ഷ്മാർജെൻഡോർഫ് ഡയറിയിൽ നിന്ന്)

---

link to image

---