വർഷങ്ങൾക്കു മുമ്പേ നിങ്ങളതിനെ ആട്ടിയോടിച്ചതായിരുന്നു,
മുറിയുമടച്ചുപൂട്ടി, അതിനെക്കുറിച്ചൊന്നുമോർക്കാതിരിക്കാൻ
നിങ്ങൾ ശ്രമിച്ചതായിരുന്നു.
സംഗീതത്തിലതില്ല എന്നു നിങ്ങൾക്കറിയാമായിരുന്നു,
അതിനാൽ നിങ്ങൾ പാടി.
മൌനത്തിലതില്ല എന്നു നിങ്ങൾക്കറിയാമായിരുന്നു,
അതിനാൽ നിങ്ങൾ മൌനിയായി.
ഏകാന്തതയിലതില്ല എന്നു നിങ്ങൾക്കറിയാമായിരുന്നു,
അതിനാൽ നിങ്ങളൊറ്റയായി.
ഇന്നു പക്ഷേ ഇതെന്തു സംഭവിച്ചു,
വർഷങ്ങളായി ആൾത്താമസമില്ലാതെ കിടന്ന
അടുത്ത മുറിയുടെ വാതിലിനടിയിൽ
രാത്രിയിൽ പെട്ടെന്നൊരു ചീളു വെളിച്ചം
നിങ്ങളുടെ കണ്ണിൽപ്പെടുന്ന പോലെ?
No comments:
Post a Comment