സിനിമകളാണെനിക്കിഷ്ടം.
പൂച്ചകളെയാണെനിക്കിഷ്ടം.
വാർത്താപുഴക്കരയിലെ ഓക്കുമരങ്ങളാണെനിക്കിഷ്ടം.
ദസ്തയേവ്സ്കിയെക്കാൾ ഡിക്കൻസിനെയാണെനിക്കിഷ്ടം.
മനുഷ്യവംശത്തെ സ്നേഹിക്കുന്ന എന്നെക്കാൾ
മനുഷ്യരെ ഇഷ്ടപ്പെടുന്ന എന്നെയാണെനിക്കിഷ്ടം.
കൈയരികിൽത്തന്നെ ഒരു സൂചിയും നൂലും സൂക്ഷിക്കുന്നതാണെനിക്കിഷ്ടം.
പച്ചനിറമാണെനിക്കിഷ്ടം.
ഇക്കണ്ട നാശത്തിനൊക്കെയുമുള്ള പഴി
യുക്തിയുടെ തലയിൽ കെട്ടിവയ്ക്കാതിരിക്കാനാണെനിക്കിഷ്ടം.
അപവാദങ്ങളാണെനിക്കിഷ്ടം.
നേരത്തേ സ്ഥലം വിടുന്നതാണെനിക്കിഷ്ടം.
ഡോക്ടർമാരോടു വേറെന്തെങ്കിലും പറഞ്ഞിരിക്കാനാണെനിക്കിഷ്ടം.
പണ്ടത്തെ മട്ടിൽ വരകൾക്കു കനം കൂടിയ വരപ്പുകളാണെനിക്കിഷ്ടം.
കവിതയെഴുതാതെ പരിഹാസപാത്രമാവുന്നതിനെക്കാൾ
കവിതയെഴുതി പരിഹാസപാത്രമാവുന്നതാണെനിക്കിഷ്ടം.
പ്രണയജീവിതത്തിൽ ദിവസേന ആഘോഷിക്കാവുന്ന തരത്തിൽ
കൃത്യമായറിയാത്ത വാർഷികങ്ങളാണെനിക്കിഷ്ടം.
യാതൊന്നും വാഗ്ദാനം ചെയ്യാത്ത സദാചാരചിന്തകരെയാണെനിക്കിഷ്ടം.
കണക്കു കൂട്ടി ചെയ്യുന്ന നന്മയെക്കാൾ വിശ്വസിച്ചു ചെയ്യുന്ന നന്മയാണെനിക്കിഷ്ടം.
പട്ടാളവേഷത്തിലല്ലാത്ത ഭൂമിയെയാണെനിക്കിഷ്ടം.
കീഴടക്കുന്ന രാജ്യങ്ങളെക്കാൾ കീഴടങ്ങിയ രാജ്യങ്ങളെയാണെനിക്കിഷ്ടം.
ചില തടസ്സവാദങ്ങളുണ്ടായിരിക്കുന്നതാണെനിക്കിഷ്ടം.
ചിട്ടയൊപ്പിച്ച നരകത്തെക്കാൾ താറുമാറായ നരകമാണെനിക്കിഷ്ടം.
പത്രങ്ങളുടെ മുൻപേജുകളെക്കാൾ ഗ്രിമ്മിന്റെ യക്ഷിക്കഥകളാണെനിക്കിഷ്ടം.
ഇലകളില്ലാത്ത പൂക്കളെക്കാൾ പൂക്കളില്ലാത്ത ഇലകളാണെനിക്കിഷ്ടം.
വാലു മുറിച്ചു ചെറുതാക്കിയ നായ്ക്കളെക്കാൾ വാലു മുറിക്കാത്ത നായ്ക്കളെയാണെനിക്കിഷ്ടം.
എന്റെ കണ്ണുകൾ ഇരുണ്ടതാണെന്നതിനാൽ തെളിഞ്ഞ കണ്ണുകളാണെനിക്കിഷ്ടം.
മേശവലിപ്പുകളാണെനിക്കിഷ്ടം.
ഇവിടെ പറയാത്ത പലതിനെക്കാളും ഇവിടെ സൂചിപ്പിക്കാത്ത പലതുമാണെനിക്കിഷ്ടം.
ഒരക്കത്തിന്റെ പിന്നാലെ നിരന്നുനിൽക്കുന്ന പൂജ്യങ്ങളെക്കാൾ
പിടി തരാതെ നടക്കുന്ന പൂജ്യങ്ങളെയാണെനിക്കിഷ്ടം.
നക്ഷത്രങ്ങളുടെ നേരത്തെക്കാൾ കീടങ്ങളുടെ നേരമാണെനിക്കിഷ്ടം.
തടിയിൽ തട്ടിനോക്കുന്നതാണെനിക്കിഷ്ടം.
ഇനിയെത്ര നേരമുണ്ടെന്നും എപ്പോഴെന്നും ചോദിക്കാതിരിക്കുന്നതാണെനിക്കിഷ്ടം.
ജീവിതത്തിന്‌ അതിന്റേതായ ചില കാരണങ്ങളുണ്ടാവാമെന്ന സാദ്ധ്യത മനസ്സിൽ വയ്ക്കുന്നതാണെനിക്കിഷ്ടം.
No comments:
Post a Comment