ഞാനൊരു ട്രാൻക്വിലൈസർ.
വീട്ടിൽ ഞാൻ വളരെ ഫലപ്രദമാണ്‌.
ഓഫീസിൽ ഞാൻ പണിയെടുക്കാം.
പരീക്ഷയെ നേരിടാം,
സാക്ഷിക്കൂട്ടിൽ കയറിനിൽക്കാം.
ഉടഞ്ഞ കപ്പുകൾ കരുതലോടെ കൂട്ടിയിണക്കാം.
നിങ്ങളെന്നെ വായിലിടുകയേ വേണ്ടു,
നാവിനടിയിൽ ഞാനൊന്നലിയട്ടെ,
ഒരു ഗ്ളാസു വെള്ളവുമായി
എന്നെ അകത്താക്കുക.
ഭാഗ്യക്കേടുകളെ കൈകാര്യം ചെയ്യാനെനിക്കറിയാം,
ദുഃഖവാർത്തകളെ കൈക്കൊള്ളാനും.
അനീതിയുടെ ഭാരം ഞാൻ കുറയ്ക്കാം,
ദൈവത്തിന്റെ അഭാവം സഹിക്കാൻ സഹായിക്കാം,
നിങ്ങളുടെ മുഖത്തിനു ചേരുന്ന വിധവയുടെ മൂടുപടവും
ഞാൻ തിരഞ്ഞെടുത്തു തരാം.
ഇനിയുമെന്തു കാത്തിരിക്കുകയാണെന്നേ?
എന്റെ രാസസഹതാപത്തിൽ വിശ്വസിച്ചോളൂ.
അധികം പ്രായമാവാത്ത ചെറുപ്പക്കാരൻ/ചെറുപ്പക്കാരി ആണല്ലോ നിങ്ങൾ.
മനസ്സിന്റെ ഭാരമിറക്കിവയ്ക്കുന്ന പണി പഠിക്കാൻ
ഇനിയും നിങ്ങൾക്കു വൈകിയിട്ടില്ല.
ആരു പറഞ്ഞു,
വരുന്നതിനോടൊക്കെ മല്ലു പിടിക്കണമെന്ന്?
നിങ്ങളുടെ കൊടുംഗർത്തമെനിക്കു തരൂ,
ഞാനതിന്മേൽ നിദ്രയുടെ മൃദുമെത്ത വിരിക്കാം.
വന്നു വീഴാൻ നാലു കാലു നൽകിയെന്നതിനാൽ
നിങ്ങൾക്കെന്നോടു നന്ദിയേ ഉണ്ടാവൂ.
നിങ്ങളുടെ ആത്മാവെനിക്കു വിൽക്കൂ.
വാങ്ങാൻ വേറെയാരുമില്ല.
ഞാനല്ലാതൊരു പിശാചുമില്ല.
No comments:
Post a Comment