പ്രിയപ്പെട്ട ഫ്രൌളിൻ ഫെലിസ്,
നിങ്ങൾ ഇനിയെനിക്കു കത്തെഴുതരുത്; ഞാനും നിങ്ങൾക്കെഴുതുകയില്ല. എന്റെ കത്ത് നിങ്ങളുടെ സന്തോഷം നശിപ്പിക്കുകയേയുള്ളു; ഞാനാകട്ടെ, ഇനിയേതു സഹായം കൊണ്ടും രക്ഷ കിട്ടാത്തവനും. ഇതു സ്വയം ബോദ്ധ്യമാകാനായി ഘടികാരത്തിൽ മണിയടിക്കുന്നതും കേട്ട് രാത്രി മുഴുവൻ ഉറങ്ങാതെ കിടക്കേണ്ട ആവശ്യമുണ്ടായിരുന്നില്ല എനിക്ക്; നിങ്ങൾക്കു ഞാൻ ആദ്യത്തെ കത്തെഴുതുമ്പോൾത്തന്നെ എനിക്കതു ബോദ്ധ്യമായിക്കഴിഞ്ഞിരിക്കുന്നു. എന്നിട്ടുകൂടി നിങ്ങൾക്കു മേൽ എന്നെ വച്ചുകെട്ടാൻ ഞാൻ ശ്രമിച്ചുവെങ്കിൽ ശപിക്കപ്പെടാൻ തീർത്തും യോഗ്യനെന്നേ എന്നെക്കുറിച്ചു പറയാനുള്ളു, ഇതിനകം ശപിക്കപ്പെട്ടവനായിട്ടില്ല ഞാനെങ്കിൽ. നിങ്ങളുടെ കത്തുകൾ മടക്കിവേണമെന്നാണെങ്കിൽ തീർച്ചയായും ഞാനവ തിരിച്ചയക്കാം, അവ കൈയിൽ വയ്ക്കാനാണ്‌ ഞാൻ ഇഷ്ടപ്പെടുക എങ്കിൽക്കൂടി. ഇനിയല്ല, നിങ്ങൾക്കു നിർബ്ബന്ധമാണെങ്കിൽ അതിന്റെ സൂചനയായി ഒരു പോസ്റ്റുകാർഡ് ഒന്നുമെഴുതാതെ എന്റെ പേർക്കയക്കുക. നേരേ മറിച്ച്, ഞാനയച്ച കത്തുകൾ നിങ്ങൾ തന്നെ സൂക്ഷിച്ചുവയ്ക്കുക എന്നു ഞാൻ അപേക്ഷിക്കട്ടെ. ഇനി എന്നെ, ഈ പ്രേതത്തെ എത്രയും വേഗം മറന്നുകളഞ്ഞേക്കൂ. മുമ്പത്തെപ്പോലെ സന്തോഷവതിയായി, മനസ്സമാധാനത്തോടെ ജീവിതം തുടരുകയും ചെയ്യൂ.
(1912 നവംബർ 9നു ഫെലിസിനെഴുതിയത്; ഇതു പക്ഷേ പോസ്റ്റു ചെയ്തിട്ടില്ല.)
…കണ്ണീരു കണ്ടാൽ എനിക്കു പേടി വരും. എനിക്കു കരച്ചിൽ വരാറില്ല. മറ്റുള്ളവരുടെ കണ്ണീരാവട്ടെ, എനിക്കപരിചിതമായ, എനിക്കു മനസ്സിലാവാത്ത ഒരു പ്രതിഭാസവും. ഇത്രയും കൊല്ലത്തിനിടയിൽ ഒരിക്കലേ ഞാൻ കരഞ്ഞിട്ടുള്ളു; അത് രണ്ടുമൂന്നു മാസം മുമ്പായിരുന്നു; അന്നു ഞാൻ ശരിക്കും കസേരയിലിരുന്നു വിറയ്ക്കുകയായിരുന്നു. എന്റെ നിയന്ത്രണം വിട്ട തേങ്ങൽ കേട്ട് അടുത്ത മുറിയിൽ കിടക്കുന്ന അച്ഛനും അമ്മയും എഴുനേറ്റുവരുമോയെന്നു എന്നു ഞാൻ ഭയന്നു. ഒരു രാത്രിയിൽ നടന്ന സംഭവമാണിത്; അതിനു കാരണമായതോ, ഞാൻ എഴുതിക്കൊണ്ടിരുന്ന നോവലിലെ ഒരു ഭാഗവും. പക്ഷേ പ്രിയപ്പെട്ടവളേ, നിന്റെ കരച്ചിൽ എന്നെ വേവലാതിപ്പെടുത്തുന്നു; അതോ അത്ര പെട്ടെന്ന് നിനക്കു കരച്ചിൽ വരാറുണ്ടോ? നീ എപ്പോഴും കരയാറുണ്ടോ? ഇനിയഥവാ, ഞാനാണോ അതിനു കാരണമായത്? അതെ, ഞാൻ തന്നെ. പറയൂ, നിന്നോടിത്രയും കടപ്പെട്ട മറ്റൊരാളുണ്ടാവുമോ, എന്നെപ്പോലെ ഒരു കാരണവുമില്ലാതെ ഇത്രയും നിന്നെ വേദനിപ്പിക്കുന്നവൻ? നീ പറയാതെ തന്നെ എനിക്കതറിയാം. പക്ഷേ ഞാനതു വേണമെന്നു വച്ചു ചെയ്യുന്നതല്ല എന്നു നീ അറിയണം, ഫെലിസ്…നിന്റെ മനോഹരമായ ഈറൻകണ്ണുകളിൽ ഞാനൊന്നു ചുംബിക്കട്ടെ?
(1912 നവംബർ 28ന്‌ ഫെലിസിനെഴുതിയത്)
No comments:
Post a Comment