തദേവുഷ് റോസെവിച്ച് - - കിഴവികളെക്കുറിച്ച് ഒരു കഥ

---

എനിക്കിഷ്ടമാണു കിഴവികളെ
വിരൂപകളെ
ദുഷ്ടകളെ
ഭൂമിയുടെ ഉപ്പാണവർ
മനുഷ്യമാലിന്യം കണ്ടാൽ
അവർക്കറയ്ക്കില്ല
നാണയത്തിന്റെ മറുവശം
അവർ കണ്ടിരിക്കുന്നു
സ്നേഹത്തിന്റെയും
വിശ്വാസത്തിന്റെയും
ഏകാധിപതികൾ
കോമാളി കളിച്ചു നടക്കട്ടെ
കൈയിൽ മനുഷ്യച്ചോരയുമായി
വന്നുപോകട്ടെ
കിഴവികൾ അതികാലത്തെഴുന്നേൽക്കുന്നു
ഇറച്ചിയും റൊട്ടിയും പഴവും വാങ്ങുന്നു
അടിച്ചുവാരുന്നു പാചകം ചെയ്യുന്നു
കൈയും കെട്ടി തെരുവിൽ നിൽക്കുന്നു
ക്ഷമയോടെ
ചിരഞ്ജീവികളാണു
കിഴവികൾ
ഹാംലറ്റ് കെണിയിൽ കിടന്നു
കൈകാലിട്ടടിക്കട്ടെ
ഫൌസ്റ്റ് നിന്ദ്യമായ വിഡ്ഡിവേഷം കെട്ടട്ടെ
റാസ്ക്കോൾ നിക്കോഫ് മഴുവെടുത്തു വെട്ടട്ടെ
നാശമില്ലാത്തവരാണു കിഴവികൾ
വാത്സല്യത്തോടെ അവർ മന്ദഹസിക്കുന്നു
ഒരു ദേവൻ മരിക്കുന്നു
കിഴവികൾ പതിവു പോലെ കാലത്തെഴുന്നേല്ക്കുന്നു
മീനും റൊട്ടിയും വീഞ്ഞും വാങ്ങുന്നു
ഒരു സംസ്കാരം മരിക്കുന്നു
കിഴവികൾ പതിവുപോലെ കാലത്തെഴുന്നേൽക്കുന്നു
ജനാലകൾ തുറന്നിടുന്നു
മാലിന്യങ്ങൾ ദൂരെക്കൊണ്ടുകളയുന്നു
ഒരാൾ മരിക്കുന്നു
അവർ ജഡത്തെ കുളിപ്പിക്കുന്നു
മരിച്ചവരെ അടക്കുന്നു
കുഴിമാടത്തിൽ പൂക്കൾ വയ്ക്കുന്നു
എനിക്കിഷ്ടമാണു കിഴവികളെ
വിരൂപകളെ
ദുഷ്ടകളെ
അവർ നിത്യജീവനിൽ വിശ്വസിക്കുന്നു
ഭൂമിയുടെ ഉപ്പാണവർ
മരത്തിന്റെ തൊലിയാണവർ
മൃഗങ്ങളുടെ എളിമയുള്ള കണ്ണുകളാണവർ
ഭീരുത്വവും വീരത്തവും മഹത്വവും ഹീനതയും
അതാതിന്റെ തോതിൽ അവർ കാണുന്നുണ്ട്
ദൈനന്ദിനജീവിതത്തിനു വേണ്ട അളവിൽ
അവരെടുക്കുന്നുണ്ട്
അവരുടെ മക്കൾ അമേരിക്ക കണ്ടുപിടിക്കുന്നു
തെർമോപൈലേയിൽ പടവെട്ടി മരിക്കുന്നു
കുരിശിൽ കിടന്നു ചാവുന്നു
പ്രപഞ്ചത്തെ കീഴടക്കുന്നു
കിഴവികൾ അതികാലത്തെഴുന്നേൽക്കുന്നു
പട്ടണത്തിൽ പോയി പാലും റൊട്ടിയും ഇറച്ചിയും വാങ്ങുന്നു
സൂപ്പു താളിക്കുന്നു
ജനാലകൾ തുറന്നിടുന്നു
വിഡ്ഡികളേ കളിയാക്കുള്ളു
‘കിഴവികളെ
വിരൂപകളെ
ദുഷ്ടകളെ
ഇവർ സുന്ദരികളത്രെ
കാരുണ്യവതികളത്രെ
ഒരു ഭ്രൂണമാണവർ
നിഗൂഢതയില്ലാത്ത നിഗൂഢത
ഉരുണ്ടുരുണ്ടുപോകുന്നൊരു ഗോളം
പവിത്രമാർജ്ജാരങ്ങളുടെ
മമ്മികളാണവർ
ശുഷ്ക്കിച്ച
ഉണങ്ങിച്ചുരുണ്ട
പഴങ്ങളാണവർ
അല്ലെങ്കിൽ
കൊഴുത്തുരുണ്ട ബുദ്ധന്മാർ
അവർ മരിക്കുമ്പോൾ
ഒരു കണ്ണുനീർത്തുള്ളി
കവിളിലൂടുരുണ്ടിറങ്ങുന്നു
ഒരു പെൺകുട്ടിയുടെ ചുണ്ടത്തെ
പുഞ്ചിരിയിൽ ചെന്നുചേരുന്നു

---

തെർമോപൈലേ - ക്രി.മു.480ൽ ഗ്രീക്ക് നഗരരാഷ്ട്രങ്ങളും പേഴ്സ്യയും തമ്മിൽ യുദ്ധം നടന്ന സ്ഥലം.

---

link to image

---

Translator Joanna Trzeciak reads from Sobbing Superpower: Selected Poems of Tadeusz Rosewicz

---