നിസാർ ഖബ്ബാനി - പ്രണയകവിതകൾ

 

---

പ്രണയിക്കാൻ നിങ്ങളെപ്പഠിപ്പിക്കാൻ

---

പ്രണയിക്കാൻ നിങ്ങളെപ്പഠിപ്പിക്കാൻ
ഞാനാളല്ല ഗുരുവാകാൻ.
മീനുകൾക്കൊരു ഗുരു വേണ്ടല്ലോ
നീന്താനവയെപ്പഠിപ്പിക്കാൻ.
കിളികൾക്കൊരു ഗുരു വേണ്ടല്ലോ
പറക്കാനവയെപ്പഠിപ്പിക്കാൻ.
നിങ്ങൾ തന്നെ ചിറകെടുക്കൂ.
നിങ്ങൾ തന്നെയിറങ്ങിനീന്തൂ.
പ്രണയത്തിനില്ല പാഠപുസ്തകങ്ങൾ,
നിരക്ഷരരായിരുന്നു
ചരിത്രത്തിൽ പേരു കേൾപ്പിച്ച കമിതാക്കളും.

---

നിന്നെ പ്രണയിക്കുന്നുവെന്നു ഞാൻ നിന്നോടു പറയുമ്പോൾ

---

നിന്നെ പ്രണയിക്കുന്നുവെന്നു ഞാൻ നിന്നോടു പറയുമ്പോൾ
എനിക്കറിയാം
വായിക്കാനറിയാത്തൊരു നഗരത്തിനായി
പുതിയൊരക്ഷരമാല കണ്ടുപിടിക്കുകയായിരുന്നു ഞാനെന്ന്,
ആളൊഴിഞ്ഞ കസേരകൾക്കു മുന്നിൽ
കവിത വായിക്കുകയായിരുന്നു ഞാനെന്ന്,
ലഹരിയുടെ ആനന്ദങ്ങളറിയാത്തവർക്കു മുന്നിൽ
മദ്യമൊഴിച്ചുവയ്ക്കുകയായിരുന്നു ഞാനെന്ന്.

---