1
ഉരലിൽ പെരുമാറി
തഴമ്പിച്ചതാണെന്റെ കൈകളെങ്കിലും
ഇന്നു രാത്രിയിലുമെന്റെ യജമാനന്റെ മകൻ വരും
ഇടറിയ നെടുവീർപ്പുമായവയെക്കടന്നുപിടിയ്ക്കാൻ.
(എട്ടാം നൂറ്റാണ്ട്)
2
ഉറയൂരിയൊരുടവാൾ
ഉടലോടടുക്കിപ്പിടിച്ചെന്നു
ഞാനിന്നലെ സ്വപ്നം കണ്ടു;
വൈകില്ല നീ വരാനെന്നല്ലേ,
ഞാനതിനെ വ്യാഖ്യാനിക്കേണ്ടു?
(കാസാ പ്രഭ്വി - എട്ടാം നൂറ്റാണ്ട്)
3
കടലോരത്തിടിവെട്ടിക്കൊ-
ണ്ടാഞ്ഞടിക്കും തിര പോലെ
എന്നെപ്പേടിപ്പെടുത്തുവോനേ നിന്നി-
ലെൻ പ്രേമമെത്രയചഞ്ചലമേ.
(കാസാ പ്രഭ്വി - എട്ടാം നൂറ്റാണ്ട്)
4
മുളയിലകളിലാലിപ്പഴ-
മൊച്ചപ്പെടുന്ന രാത്രികളിൽ
ഒറ്റയ്ക്കുറങ്ങാൻ വെറുപ്പാണെനിയ്ക്ക്.
(ഇസുമി ഷിക്കിബു - പത്താം നൂറ്റാണ്ട്)
5
അന്യോന്യമൊന്നും നല്കാതെ
ദീർഘിച്ച ഹേമന്തമൊന്നു കഴിച്ചതിൽപ്പിന്നെ
അന്യോന്യം നാം കൂട്ടിമുട്ടുന്നു,
കൈകളിൽ പൂക്കളുമായി.
(ചിയോ -1703-1775)
1 comment:
എവിടെനിന്നു കണ്ടെടുക്കുന്നു ഈ മുത്തുകളെ?
“അന്യോന്യമൊന്നും നല്കാതെ
ദീർഘിച്ച ഹേമന്തമൊന്നു കഴിച്ചതിൽപ്പിന്നെ
അന്യോന്യം നാം കൂട്ടിമുട്ടുന്നു,
കൈകളിൽ പൂക്കളുമായി“..
നന്ദിയുണ്ട്..
അഭിവാദ്യങ്ങളോടെ
Post a Comment