ഇടത്തുകാൽ സാധാരണമട്ടിലുള്ളതു തന്നെ
ശുഭാപ്തിവിശ്വാസമുള്ളതെന്നു കൂടി പറഞ്ഞോളൂ
അല്പം നീളക്കുറവുണ്ടെന്നു തോന്നാം
ഒരു പയ്യൻസ്വഭാവവുമുണ്ട്
ഉരുണ്ടുകൂടിയ പേശികളും
ഭംഗിയുള്ള കാൽവണ്ണയുമായി
വലത്തേത്
-കർത്താവേ കൃപ വേണമേ-
എല്ലും തൊലിയുമായി
രണ്ടു വടുക്കളുമായി
ഒന്നു മടമ്പിൽ
മറ്റേതു ദീർഘവൃത്തത്തിൽ
ഇളംചുവപ്പു നിറത്തിൽ
ഒരൊളിച്ചോട്ടത്തിന്റെ മാനം കെട്ട ഓർമ്മയായി
ഇടതുകാലിന്‌
കുതി കൊള്ളുന്ന ശീലമുണ്ട്
നൃത്തച്ചുവടു വയ്ക്കുമ്പോലെയും
ഏതപകടത്തിലും തല കൊണ്ടു വച്ചുകൊടുക്കുന്ന പോലെ
ജീവിതാസക്തി കൂടിയതും
വലംകാൽ
തറവാടിയായ ദാർഢ്യക്കാരൻ
അപകടങ്ങളെ അപഹസിക്കുന്നവൻ
അങ്ങനെ
രണ്ടു കാലുകളുമായി
ഇടത്തേതു സാഞ്ചോ പാൻസയോടുപമിക്കാവുന്നതും
വലത്തേത്
ആ ഊരുതെണ്ടി പ്രഭുവിനെ ഓർമ്മിപ്പിക്കുന്നതും
ശ്രീമാൻ കോജിറ്റോ
ലോകത്തിലൂടെ കടന്നുപോവുന്നു
അല്പമൊന്നു വേയ്ച്ചും
No comments:
Post a Comment