ഉദാഹരണത്തിന്‌
പരിഹാസ്യമായ സംഗതികൾ
ഒരുപാടുണ്ട്
ഫോണിലൂടെ നിന്റെ ശബ്ദം കേൾക്കുമ്പോൾ
അതിനെ ചുംബിക്കുക
ഒരുദാഹരണം.
അതിലും പരിഹാസ്യമാണ്‌
ദാരുണവുമാണ്‌
നിന്നെ ചുംബിക്കാനാവില്ലെന്നിരിക്കെ
എന്റെ ഫോണിനെ
ചുംബിക്കാതിരിക്കുക.
കാലത്തൊരു ചെളി വാരിയെറിയൽ
നിന്നോടു ഞാനെന്റെ പ്രണയം പ്രഖ്യാപിച്ചപ്പോൾ
നീയതു തള്ളിക്കളഞ്ഞു
ഒരു വിശദീകരണവും നൽകി:
“ഇപ്പൊക്കണ്ട സ്വപ്നത്തിൽ
ഞാനൊരു ചുള്ളനെക്കണ്ടു,
ആളു കണ്ണുപൊട്ടനായിരുന്നു
ജർമ്മൻകാരനും.
നല്ല തമാശയല്ലേ?”
ഞാൻ നിനക്കു നല്ല സ്വപ്നങ്ങൾ നേർന്നു
എന്റെ മേശയ്ക്കരികിലേക്കു ഞാൻ
തിരിച്ചുപോയി
എനിക്കു പക്ഷേ അസൂയ തോന്നി
മുമ്പൊന്നും തോന്നാത്ത മാതിരി.
രാക്കവിത
ചുംബനങ്ങൾ കൊണ്ടല്ല
നിന്റെ പുതപ്പു കൊണ്ടു
നിന്നെപ്പൊതിയാൻ
(നിന്റെ ചുമലിൽ നിന്ന്
അതൂർന്നുപോയിരുന്നു)
ഉറക്കത്തിൽ
നിനക്കു കുളിരാതിരിക്കാൻ
നീ
ഉറക്കം വിട്ടെഴുന്നേറ്റതില്പിന്നെ
ചെന്നു ജനാലയടയ്ക്കാൻ
നിന്നെപ്പുണരാൻ
ചുംബനങ്ങൾ കൊണ്ടു
നിന്നെപ്പൊതിയാൻ
നിന്നെ
കണ്ടെത്താൻ.
No comments:
Post a Comment