നല്ല തോട്ടക്കാർ
എന്തു രസമാണ്‌
കൈയിൽ കൈ കോർത്തു
തോട്ടത്തിൽ നടക്കാൻ
നമ്മുടെ തൈമരത്തിനു
നനച്ചുകൊടുക്കാൻ
അതിനെ പരിപാലിക്കാൻ
ഞാൻ കമ്പിളിപ്പുഴുക്കളെ പെറുക്കിക്കളയുന്നു
നീയതിനു വെള്ളം തളിയ്ക്കുന്നു!
അതെത്ര പച്ചപ്പോടെ നിന്നേനേ
നാമതിന്റെ വേരുകൾ
കൊത്തിനുറുക്കിയിരുന്നില്ലെങ്കിൽ
കണക്കൊപ്പിക്കാതെ
നിന്നെക്കാൾ വല്ലാതെ
പ്രായം കൂടി എനിക്കെന്ന്
എന്നെക്കാൾ വല്ലാതെ
പ്രായം കുറവാണു നിനക്കെന്ന്
നമ്മെക്കാൾ ബോധം കൂടിയവർ
തങ്ങൾ കണക്കു കൂട്ടിയ
സ്വന്തം ഭാവികളെ
കൃത്യമായ അളവൊപ്പിച്ചു
മുറിച്ചെടുക്കുന്ന പണിപ്പുരകളിലേക്കു മാത്രം
നിർണ്ണായകമാണതൊക്കെ
മഞ്ഞുകാലത്തെ പൂന്തോട്ടം
മഞ്ഞയും ചുവപ്പും നിറമുള്ള
രണ്ടു സ്റ്റാമ്പുകളൊട്ടിച്ച
നിന്റെ കവർ
ഞാനൊരു ചെടിച്ചട്ടിയിൽ നട്ടു
എന്നും ഞാനതിനു
നനച്ചുകൊടുക്കും
നിന്റെ കത്തുകൾ
എനിക്കായി വളരട്ടെ
മനോഹരവും
വ്യസനം നിറഞ്ഞതുമായ കത്തുകൾ
നിന്നെപ്പോലെ മണക്കുന്ന
കത്തുകൾ
ഞാനിതു
നേരത്തേ ചെയ്യേണ്ടതായിരുന്നു
ഈ കാലമെത്തുന്നതു വരെ
കാക്കരുതായിരുന്നു
link to image
No comments:
Post a Comment