സ്ബിഗ്നിയെഫ് ഹെർബർട്ട് - പ്രതിജ്ഞ

---

നിങ്ങളെ ഞാനൊരുനാളും മറക്കില്ല -
മിന്നായം പോലെ ഞാൻ കണ്ട സ്ത്രീകളേ പെൺകുട്ടികളേ
കോണിപ്പടികളിൽ ആൾക്കൂട്ടത്തിൽ അങ്ങാടിയിൽ
അടിപ്പാതകളുടെ നൂലാമാലയിൽ
കാറുകളുടെ ചില്ലുജാലകങ്ങളിൽ കണ്ണിൽത്തടഞ്ഞവരേ

-വേനൽക്കാലത്തെ മിന്നൽപ്പിണർ പോലെ
നല്ല കാലാവസ്ഥയുടെ ശുഭശകുനങ്ങളായി
-തടാകത്തിലെ പ്രതിഫലനമലങ്കരിച്ച പ്രകൃതിദൃശ്യമായി
-കണ്ണാടിയിൽ ഒരു മായക്കാഴ്ചയായി
ആയിരിക്കുന്നതിന്റെയും
ആയിത്തീരുമെന്നു പ്രത്യാശിക്കുന്നതിന്റെയും പരിണയത്തിൽ
-നൃത്തവിരുന്നിൽ
സംഗീതം നേർത്തുനേർത്തില്ലാതാവുമ്പോൾ
ജനാലപ്പടികളിൽ കൊളുത്താത്ത മെഴുകുതിരികൾ
പ്രഭാതം നിരത്തിവയ്ക്കുമ്പോൾ

നിങ്ങളെ ഞാനൊരുനാളും മറക്കില്ല -
ശുദ്ധാനന്ദത്തിന്റെ ഉറവുകളേ
എനിക്കുമൊരു ജീവിതമുണ്ടെന്നായി
നിങ്ങളുടെ പേടമാൻകണ്ണുകളാൽ
എന്റേതല്ലാത്ത ചുണ്ടുകളാൽ
വെള്ളിമീനുകളെ താലോലിക്കുന്ന
വെയിലേറ്റിരുണ്ട വിരലുകളാൽ

എനിക്കേറ്റവും ഓർമ്മ നിന്നെ ആന്റിയേക്കാരിപ്പെൺകുട്ടീ
ഒരു പത്രമേജന്റിന്റെ വീട്ടിൽ
ഒരിക്കൽ മാത്രം ഞാൻ കണ്ടവളേ
നാവിറങ്ങി, ശ്വാസം മുട്ടി ഞാൻ നിന്നു
നിന്നെ പേടിപ്പിച്ചോടിക്കരുതെന്നതിനായി
ഒരു നിമിഷം ഞാനോർത്തു
നിന്നോടൊപ്പം ചേർന്നാൽ
ഈ ലോകം നമ്മൾ മാറ്റിമറിക്കുമെന്നും

നിങ്ങളെ ഞാനൊരുനാളും മറക്കില്ല-
കണ്ണിമകളുടെ വിഭ്രാന്തചലനം
മനോഹരമായി ചായുന്ന ശീർഷം
കിളിക്കൂടു പോലൊരു കൈത്തലം

ഓർമ്മയിൽ മുഖങ്ങളിലൂടെ ഞാൻ കടന്നുപോകുന്നു
മാറ്റമില്ലാത്തവ നിഗൂഢമായവ പേരില്ലാത്തവ

കറുത്ത മുടിയിൽ
ഒരു റോസാപ്പൂവും

---

link to image

---