പ്രണയവും നമ്മളും
പ്രണയത്തെക്കൊണ്ടു നമുക്കെന്തു കാര്യം?
അതു നമ്മെ സഹായിക്കാനെത്തിയോ,
തൊഴിലില്ലായ്മയ്ക്കെതിരെ
ഹിറ്റ്ലർക്കെതിരെ
കഴിഞ്ഞ യുദ്ധത്തിനെതിരെ
ഇന്നലെയ്ക്കും ഇന്നിനുമെതിരെ
പുതിയ ഭയങ്ങൾക്കും
ബോംബിനുമെതിരെ?
എന്തു സഹായമതു ചെയ്തു
നമ്മെ നശിപ്പിക്കുന്ന
സർവതിനുമെതിരെ?
ഒരു സഹായവും ചെയ്തില്ല.
പ്രണയം നമ്മെ വഞ്ചിച്ചു.
പ്രണയത്തെക്കൊണ്ടു നമുക്കെന്തു കാര്യം?
നമ്മെക്കൊണ്ടു പ്രണയത്തിനെന്തു കാര്യം?
നാമതിനെ സഹായിക്കാനെത്തിയോ,
തൊഴിലില്ലായ്മയ്ക്കെതിരെ
ഹിറ്റലർക്കെതിരെ
കഴിഞ്ഞ യുദ്ധത്തിനെതിരെ
ഇന്നലെയ്ക്കും ഇന്നിനുമെതിരെ
പുതിയ പേടികൾക്കും
ബോംബിനുമെതിരെ?
അതിനെ നശിപ്പിക്കുന്ന
സർവതിനുമെതിരെ?
ഒരു സഹായവും ചെയ്തില്ല
പ്രണയത്തെ നാം വഞ്ചിച്ചു.
പ്രസംഗങ്ങൾ
സമാധാനത്തെക്കുറിച്ച്
ആളുകളോടു പ്രസംഗിക്കുക
ഒപ്പം നിന്നെക്കുറിച്ചു ചിന്തിക്കുക
ഭാവിയെക്കുറിച്ചു പ്രസംഗിക്കുക
ഒപ്പം നിന്നെക്കുറിച്ചു ചിന്തിക്കുക
ജീവിക്കാനുള്ള അവകാശത്തെക്കുറിച്ചു പ്രസംഗിക്കുക
ഒപ്പം നിന്നെക്കുറിച്ചു ചിന്തിക്കുക
സ്വന്തം സഹജീവികളെക്കുറിച്ചാധിപ്പെടുക
ഒപ്പം നിന്നെക്കുറിച്ചു ചിന്തിക്കുക-
ആത്മവഞ്ചനയാണോ ഇത്
അതോ അന്തിമസത്യമോ?
ഒരു നിസ്സാരകാര്യം
പ്രണയമെന്താണെന്നെനിക്കറിയില്ല
അതിനി ഇതുപോലെന്തെങ്കിലുമാണെന്നു വരാം:
വിദേശയാത്ര കഴിഞ്ഞു വന്നിട്ട്
“ഞാനൊരു നീറ്റെലിയെക്കണ്ടു”
എന്നവളഭിമാനത്തോടെന്നോടു പറയുമ്പോൾ,
രാത്രിയിൽ ഉറക്കമുണരുമ്പോഴും
പിറ്റേന്നു ജോലിയിലായിരിക്കുമ്പോഴും
ആ വാക്കുകളെനിക്കോർമ്മ വരുമ്പോൾ,
അതേ വാക്കുകൾ അവൾ ഒന്നുകൂടി പറഞ്ഞുകേൾക്കാനും
പറയുമ്പോളവൾക്കതേ ഭാവമായിരിക്കാനും
എനിക്കു തിടുക്കം തോന്നുമ്പോൾ-
എനിക്കു തോന്നുന്നു അതായിരിക്കാം പ്രണയമെന്ന്
അഥവാ അതുപോലെന്തെങ്കിലുമായിരിക്കാമെന്ന്.
No comments:
Post a Comment