അനിശ്ചിതം
എനിക്കു കണ്ണുകളുണ്ടായി,
നിന്നെ ഞാൻ കാണുന്നുവെന്നതിനാൽ;
എനിക്കു കാതുകളുണ്ടായി,
നിന്നെ ഞാൻ കേൾക്കുന്നുവെന്നതിനാൽ.
എനിക്കു ചുണ്ടുകളുണ്ടായി,
നിന്നെ ഞാൻ ചുംബിക്കുന്നുവെന്നതിനാൽ.
അതേ കണ്ണുകളും കാതുകളുമാണോ
എനിക്കുണ്ടാവുക,
ഞാൻ നിന്നെ കാണാതിരിക്കുമ്പോൾ,
കേൾക്കാതിരിക്കുമ്പോൾ,
നിന്നെ ഞാൻ ചുംബിക്കാതിരിക്കുമ്പോൾ
അതേ ചുണ്ടുകളും?
*
സ്വപ്നം
രാത്രിയിൽ മരണമരികിൽ വന്നു
ഞാൻ പറഞ്ഞു:
“ആയിട്ടില്ല.”
അവൻ ചോദിച്ചു:
“എന്തുകൊണ്ടായിട്ടില്ല?”
എനിക്കു മറുപടിയുണ്ടായില്ല.
അവൻ തലയൊന്നു വെട്ടിച്ചു
പിന്നെ പതിയെ പിൻവാങ്ങി
ഇരുട്ടിലേക്ക്
എന്തുകൊണ്ടായിട്ടില്ല?
എന്റെ പ്രിയേ
നിനക്കൊരു മറുപടി പറയാനില്ലേ?
No comments:
Post a Comment