ഇനിയൊരിക്കൽക്കൂടി നിന്നെ ഞാനാദ്യമായിക്കണ്ടുവെന്നിരിക്കട്ടെ,
എന്നാൽ മറ്റൊരു മരത്തോപ്പിൽ, മറ്റൊരു കാട്ടിനുള്ളിൽ-
മഞ്ഞിന്റെ മൂടുപടത്തിനുള്ളിലനന്തതയിലേക്കു നീളവെ
മരങ്ങൾ നമുക്കായി നെടുവീർപ്പിടുക മറ്റൊരു വിധമായെന്നുവരാം...
ചാലിട്ട പച്ചപ്പിനുള്ളിൽ വിറ പൂണ്ട കിളികളെപ്പോലെ
നിന്റെ കൈകളെത്തിപ്പിടിക്കുക മറ്റു പൂക്കളെയാണെന്നു വരാം-
അജ്ഞവും മുഗ്ധവുമായ നിന്റെ ചുണ്ടുകളിൽ നിന്നുതിരുക
മറ്റു ചില വാക്കുകളായെന്നുവരാം- മറ്റു ചില വാക്കുകൾ...
ജ്വലിക്കുന്ന പനിനീർപ്പൂക്കളുടെ നിർഝരി പോലെ പൊട്ടിത്തകരാൻ
സൂര്യന്റെ നിശിതശാസനം നമ്മോടു കല്പിച്ചുവെന്നു വരാം-
ഇനിയൊരിക്കൽക്കൂടി നിന്നെ ഞാനാദ്യമായിക്കണ്ടുവെന്നിരിക്കട്ടെ,
എന്നാൽ മറ്റൊരു മരത്തോപ്പിൽ, മറ്റൊരു കാട്ടിനുള്ളിൽ...
ബോൾസ്ലാവ് ലെസ്മിയൻ (1877-1937) - സിംബലിസവും എക്സ്പ്രഷനിസവും പോളിഷ് കവിതയിലെത്തിച്ച കവി. ഉക്രെയിനിലെ കീവിൽ ഒരു ജൂതകുടുംബത്തിൽ ജനിച്ചു. വളരെ കുറച്ചു കവിതകളേ പ്രസിദ്ധപ്പെടുത്തിയുള്ളു; അവ തന്നെയും ശ്രദ്ധിക്കപ്പെട്ടുമില്ല. പോളിഷ് നാടോടിപ്പാരമ്പര്യവും വൈചിത്ര്യങ്ങളുടെ യഥാതഥമായ വിവരണവുമൊക്കെക്കലർന്ന കവിതാശൈലി പിന്നീടദ്ദേഹത്തെ പോളിഷ് കവിതയിലെ അതിപ്രമുഖരിലൊരാളാക്കി.
No comments:
Post a Comment