മുന്നിലേക്കു കയറിനിൽക്കൂ.
താനൊരു നല്ലവനാണെന്നു
ഞങ്ങൾ കേട്ടിരിക്കുന്നു.
തന്നെ വിലയ്ക്കെടുക്കാനാവില്ലത്രെ;
വീടെരിക്കുന്ന വെള്ളിടിയേയും പക്ഷേ,
വിലയ്ക്കെടുക്കാനാവില്ല.
പറഞ്ഞതിൽ ഉറച്ചുനിൽക്കുന്നവനാണു താനത്രെ.
എന്താണു പക്ഷേ, താൻ പറഞ്ഞത്?
നേരുള്ളവനാണു താനെന്നോ,
സ്വന്തം അഭിപ്രായം തുറന്നു പറയുന്നവനാണെന്നോ?
ആ അഭിപ്രായം എന്താണാവോ?
ധൈര്യവാനാണു താനത്രെ,
ആർക്കെതിരെ?
ബുദ്ധിമാനാണു താനത്രെ,
ആർക്കാണു താൻ ബുദ്ധിമാൻ?
വ്യക്തിപരമായ നേട്ടങ്ങൾ താൻ പരിഗണിക്കാറില്ലത്രെ,
പിന്നാരുടെ നേട്ടങ്ങളാണു താൻ പരിഗണിക്കുക?
നല്ല സുഹൃത്താണു താനത്രെ,
നല്ല മനുഷ്യർക്കും താനൊരു നല്ല സുഹൃത്താണോ?
എന്നാലിതു കേട്ടോളൂ:
ഞങ്ങൾക്കറിയാം.
താൻ ഞങ്ങൾക്കു ശത്രു.
അതിനാലാണിപ്പോൾ ഞങ്ങൾ തന്നെ
ഒരു ചുമരിനു മുന്നിൽ പിടിച്ചുനിർത്തുന്നത്.
പക്ഷേ തന്റെ വൈശിഷ്ട്യങ്ങളും സൽഗുണങ്ങളും പരിഗണിച്ച്
ഞങ്ങൾ തന്നെ നല്ലൊരു ചുമരിനു മുന്നിൽ നിർത്താം,
നല്ലൊരു തോക്കിൽ നിന്ന് നല്ലൊരുണ്ട കൊണ്ടു തന്നെ വെടി വയ്ക്കാം,
പിന്നെ ഈ നല്ല മണ്ണിൽ നല്ല കൂന്താലി കൊണ്ട് തന്നെ കുഴിച്ചിടുകയും ചെയ്യാം.
No comments:
Post a Comment