അബു നവാസ് - ആദ്യചുംബനം

---

ഒരു ചുംബനമവളോടു ഞാനിരന്നു,
അതെനിക്കവൾ നൽകാതെയുമല്ല;
അതു പക്ഷേ,യെത്ര തടുത്തതില്പിന്നെ,
എത്ര തിടുക്കപ്പെടുത്തിയതില്പിന്നെ.
“പീഡകേ,” പിന്നെ ഞാനവളോടു പറഞ്ഞു,
“ഒരേയൊരു ചുംബനം കൂടിത്തന്നാലും,
എങ്കിലെന്റെ ദാഹം ശമിക്കാനതു മതി.”
അതു കേട്ടവളൊന്നു മന്ദഹസിച്ചു,
ഒരു പഴമൊഴിയവളെന്നോടു പറഞ്ഞു:
“ഒരു തരുണന്റെ നെടുവീർപ്പു കേട്ടു നീ
ഒരു ചുംബനമയാൾക്കു വഴങ്ങിയെന്നാൽ.
പിന്നെയുമയാൾ നിന്റെ പിന്നാലെയെത്തും,
ഒന്നുകൂടിയെന്നു നിന്നെ വശം കെടുത്തും!”

---

അബു നവാസ് (756-814)- വിഖ്യാതനായ ക്ളാസ്സിക്കൽ അറബി കവി. ആയിരത്തൊന്നു രാവുകളിൽ ഹാരുൺ-അൽ-റഷീദിന്റെ സദസ്യനായി പ്രത്യക്ഷപ്പെടുന്നുണ്ട്.

---