എനിക്കറിയില്ല ലോകത്തിന്റെ ജാതകമെഴുതുന്നതു നക്ഷത്രങ്ങളോയെന്ന്,
ഭാഗ്യം പ്രവചിക്കുന്ന ശീട്ടുകുത്തിൽ നിന്നെന്തെങ്കിലും തെളിഞ്ഞുകിട്ടുമോയെന്ന്.
എനിക്കറിയില്ല പകിടയുരുണ്ടു നിൽക്കുന്നതൊരു നിഗമനത്തിലോയെന്ന്.
ഇതും പക്ഷേ എനിക്കറിയില്ല,
മിക്കവരും ജീവിക്കുന്ന പ്രകാരം ജീവിച്ചാൽ എന്തെങ്കിലും നേടാമോയെന്ന്.
അതെ, എനിക്കറിയില്ല,
ആരുമാധികാരികത ഉറപ്പു തരാത്ത ഈ ദൈനന്ദിനസൂര്യനിൽ
ഞാൻ വിശ്വസിക്കണോയെന്ന്,
അതോ, അതിലും ഭേദം (ഭേദമെന്നാൽ കൂടുതൽ സൌകര്യപ്രദം)
മറ്റേതെങ്കിലും സൂര്യനിൽ,
രാത്രിയിലും തിളങ്ങുന്നതൊന്നിൽ വിശ്വസിക്കുന്നതാണോയെന്ന്.
എന്റെ ധാരണാശക്തിയെ അതിശയിക്കുന്ന
വസ്തുക്കളുടെ ഗഹനമായ ധവളോജ്ജ്വലത.
തൽക്കാലത്തേക്ക്...
(നമുക്കു സാവധാനം നീങ്ങാം)
തൽക്കാലത്തേക്ക്
കോണിപ്പടിയുടെ കൈവരിയിൽ
ശരിക്കുമുറച്ചൊരു പിടുത്തം എനിക്കു കിട്ടിയിരിക്കുന്നു,
കൈ കൊണ്ടു ഞാനതിനെ മുറുകെപ്പിടിച്ചിരിക്കുന്നു,
എന്റെ സ്വന്തമല്ലാത്ത ഈ കൈവരിയെ,
കയറിപ്പോകുമ്പോൾ ഞാൻ ചാഞ്ഞുനിൽക്കുന്നതും-
അതെ, കയറുകയാണു ഞാൻ,
ഇതിലേക്കു കയറുകയാണു ഞാൻ:
എനിക്കറിയില്ല ലോകത്തിന്റെ ജാതകമെഴുതുന്നതു നക്ഷത്രങ്ങളോയെന്ന്.
(അൽവാരോ ദെ കാമ്പോ എന്ന അപരനാമത്തിൽ എഴുതിയത്)
No comments:
Post a Comment