സ്ബിഗ്നിയെവ്‌ ഹെര്‍ബര്‍ട്ട്-മനസ്സാക്ഷി

---

---

ഒരുപദേശവുമില്ല
ഒരു താക്കീതുമില്ല
എന്റെ മനസ്സാക്ഷിയ്ക്കെനിക്കു നല്കാൻ

ആകാമെന്നോ അരുതെന്നോ
അയാൾ പറയാറില്ല

അത്ര പതിഞ്ഞതാണൊച്ച
പറഞ്ഞാലൊട്ടു തിരിയുകയുമില്ല

നിങ്ങളെത്ര തല കുനിച്ചാലും
ചില അക്ഷരങ്ങളേ പുറത്തു കേൾക്കൂ
അവയ്ക്കർത്ഥവുമുണ്ടാവില്ല

ഞാനയാളെ മോശക്കാരനാക്കാറില്ല
മാന്യമായിട്ടാണെന്റെ പെരുമാറ്റം

എനിക്കു തുല്യനാണയാളെന്നു ഞാൻ നടിക്കും
അയാൾ പറയുന്നത് പ്രധാനപ്പെട്ട കാര്യമാണെന്നും

ചിലനേരം ഞാനയാളോടു വർത്തമാനത്തിനും മുതിരും
-ഇന്നലെ ഞാനൊരാളെ ധിക്കരിച്ചു കേട്ടോ
ഇന്നേവരെ ഞാനങ്ങനെയൊന്നു ചെയ്തിട്ടില്ല
ഇപ്പോഴും ഞാനതു ചെയ്യില്ല

-ഗ്ളു-ഗ്ളു

- ഞാൻ ചെയ്തതു ശരിയാണെന്നാണോ
നിങ്ങൾ പറയുന്നത്

-ഗാ-ഗോ-ഗീ

-നമുക്കൊരേ അഭിപ്രായമാണെന്നറിഞ്ഞതിൽ
സന്തോഷം

-മാ-ആ-

-നിങ്ങൾ പോയിയൊന്നു വിശ്രമിക്കൂ
നമുക്കു നാളെയും സംസാരിക്കാം

എനിക്കയാളെക്കൊണ്ട് ഒരുപയോഗവുമില്ല
എനിക്കയാളെ മറന്നുകളയാം

എനിക്കയാളിൽ ഒരു പ്രതീക്ഷയുമില്ല
സഹതാപം കൊണ്ടു മൂടി
അയാളവിടെക്കിടക്കുമ്പോൾ
കനക്കെ ശ്വാസം വിട്ടുകൊണ്ട്
വായും തുറന്നുകൊണ്ട്
നിശ്ചേഷ്ടമായ തല പൊന്തിക്കാൻ
അയാൾ നോക്കുമ്പോൾ
ഒരു പശ്ചാത്താപം മാത്രം

---