ഇന്നേരം ഞാൻ മരണപ്പെട്ടാലെന്തുചെയ്യും നീ, ദൈവമേ?
നിന്റെ മൺകൂജ ഞാൻ വീണുടഞ്ഞാൽ?
നിന്റെ പാനീയം ഞാൻ പുളിച്ചുപോയാൽ, വരണ്ടുപോയാൽ?
ഞാൻ നിന്റെയുടയാട, നീ വ്യാപരിക്കുന്ന വ്യവഹാരം.
നിനക്കർത്ഥമില്ലാതാകും, ഞാനില്ലാതെപോയാൽ.
നിനക്കു വീടില്ലാതാകും, ഞാനില്ലാതെയായാൽ.
ആരു സ്വാഗതം ചെയ്യാൻ നിന്നെ , ഊഷ്മളമായും മധുരമായും പിന്നെ?
ഞാൻ നിന്റെ പാദുകങ്ങൾ: ഞാനില്ലാതെ
നഗ്നമായലയും നിന്റെ കാലടികൾ.
നിന്റെ മേലാടയൂർന്നുവീഴും.
എന്റെ കവിളിന്റെ ചൂടിൽ തലയണച്ച നിന്റെ കടാക്ഷമോ,
ഒരുകാലം ഞാൻ നൽകിയ സുഖങ്ങൾക്കായി ഖേദിച്ചലയും.
-അസ്തമയത്തിന്റെ നിറങ്ങൾ മായുമ്പോൾ
അന്യശിലകളുടെ മടിയിൽ വീണു നീയുറങ്ങും.
എന്തുചെയ്യും നീ, ദൈവമേ? പേടിയാവുകയാണെനിക്ക്.
ചിത്രം:റില്‍ക്കെയുടെ ശവമാടം
No comments:
Post a Comment